യാത്രക്കാരുടെ ശ്രദ്ധക്ക്; ജിദ്ദ- മദീന റോഡ് ഭാഗികമായി വ്യാഴാഴ്ച അടച്ചിടും

മദീന: സഊദി അറേബ്യയിലെ പ്രധാന പാതകളിലൊന്നായ ജിദ്ദ- മദീന റോഡ് ഭാഗികമായി വ്യാഴാഴ്ച അടച്ചിടും. നാളെ പുലര്‍ച്ചെ 3 മുതല്‍ വെള്ളിയാഴ്ച രാവിലെ 11 വരെയാണ് റോഡ് അടച്ചിടുകയെന്ന് ജിദ്ദ മുനിസിപ്പാലിറ്റി അറിയിച്ചു. റോഡിലെ നടപ്പാലം നീക്കം ചെയ്യുന്നതിന്റെ ഭാഗമായാണ് റോഡ് അടക്കുന്നത്. തെക്ക് ഖുറൈശ് റോഡിനും വടക്ക് ഉമര്‍ അബ്ദുല്‍ ജബ്ബാര്‍ റോഡിനും ഇടയിലാണ് അടയ്ക്കുക.

ഈ റോഡിലൂടെ വരുന്ന വാഹനങ്ങൾ ഖുറൈശ് റോഡിനും അബ്ദുല്‍ ജബ്ബാര്‍ റോഡിനും മുൻപായി മറ്റു സർവീസ് റോഡുകളിലേക്ക് തിരിയണം. വടക്ക് ഭാഗത്തേയ്ക്ക് പോകുന്ന വാഹനങ്ങള്‍ ഖുറൈശ് റോഡിലേക്കുള്ള സര്‍വീസ് റോഡ് വഴിയും തെക്ക് ഭാഗത്തേയ്ക്ക് പോകുന്ന വാഹനങ്ങള്‍ ഉമര്‍ അബ്ദുല്‍ ജബ്ബാര്‍ റോഡിലേക്കുള്ള സര്‍വീസ് റോഡ് വഴിയും തിരിഞ്ഞുപോകണം. ട്രാഫിക് വിഭാഗവുമായി സഹകരിച്ചാണ് റോഡ് അടച്ചിടുന്നതെന്ന് നഗരസഭ അറിയിച്ചു.