മേപ്പാടി: വയനാട് വന്യ ജീവി സങ്കേതം ഉള്‍പ്പടെയുള്ള വയനാടന്‍ വനമേഖലയിലെ വന്യ ജീവികളുടെ കണക്കെടുപ്പ് ആരംഭിച്ചു. മാംസഭോജികളായ കടുവ, പുലി, കാട്ടുപന്നി, കുറുക്കന്‍, കുറുനരി എന്നീ മൃഗങ്ങളുടെ കണക്കെടുപ്പാണ് സംസ്ഥാനത്തൊട്ടാകെ ഇന്നലെ ആരംഭിച്ചത്. സൗത്ത് വയനാട്, നോര്‍ത്ത് വയനാട് വൈല്‍ഡ് ലൈഫ് എന്നിവയുടെ പത്ത് ഫോറസ്റ്റുകള്‍ക്ക് കീഴില്‍ വരുന്ന വനത്തിലും ഇന്നലെ രാവിലെ 6.30 മുതല്‍ കണക്കെടുപ്പ് ആരംഭിച്ചു.
മാംസ ഭോജികളായ മൃഗങ്ങള്‍ അവയുടെ ഇരകള്‍ എന്നിവയുടെ ആവാസ വ്യവസ്ഥയും എണ്ണവുമാണ് രേഖപ്പെടുത്തുന്നത്. ഓരോ റെയ്ഞ്ചുകളും പ്രത്യേക ബ്ലോക്കുകളാക്കി തിരിച്ചാണ് കണക്കെടുപ്പ് നടത്തുന്നത്. ഇതിനായി വനപാലകര്‍ക്ക് നേരത്തെ തന്നെ പരിശീലനം നല്‍കിയിരുന്നു.
വനത്തില്‍ മൃഗങ്ങളുടെ കാല്‍പാടുകള്‍, കാഷ്ടം, രോമം തുടങ്ങിയ അടയാളങ്ങള്‍ രേഖപ്പെടുത്തിയാണ് എണ്ണം കണക്കാക്കുന്നത്. ഇതില്‍ കടുവയുടെ എണ്ണം കണക്കാക്കുന്നതിനാണ് പ്രത്യേക പ്രാധാന്യം കല്‍പ്പിക്കുന്നത്. ഏതാനും വര്‍ഷങ്ങള്‍ക്കുള്ളില്‍ നിരവധി കടുവകള്‍ ചാവുകയോ കെണി ഒരുക്കി പിടിക്കുകയോ ചെയ്തിട്ടുണ്ട്.
നിലവില്‍ കടുവയുടെ എണ്ണം എത്ര, ആവാസ വ്യവസ്ഥക്ക് സംഭവിച്ച മാറ്റം എന്നിവ കൃത്യമായി രേഖപ്പെടുത്തും.
 10 ദിവസമാണ് സെന്‍സസ് നീണ്ടുനില്‍ക്കുക. വംശനാശം സംഭവിച്ച കുറുക്കന്റെ സാന്നിദ്ധ്യം വയനാടന്‍ വനത്തില്‍ ഉണ്ടോ എന്നത് കൗതുകകരമാണ്. കാട്ടുപന്നി എന്നറിയപ്പെടുന്ന ചെന്നായ്കളുടെ എണ്ണം വയനാട്ടില്‍ വര്‍ദ്ധിച്ചതായാണ് കണക്കുകള്‍.
ഈ അടുത്ത കാലത്തായി മറ്റു വന്യ മൃഗങ്ങളുടെ അക്രമണത്തിനൊപ്പം ചില ഗ്രാമങ്ങളില്‍ ചെന്നായയുടെ ആക്രമണവും ഉണ്ടായിരുന്നു. മുത്തങ്ങ, തോല്‍പ്പെട്ടി റെയ്ഞ്ചുകളിലെ സര്‍വേയ്ക്ക് കൂടുതല്‍ പേരെ ഉപയോഗിക്കുന്നുണ്ട്.