ന്യൂഡല്‍ഹി: പെഗസസ് ഫോണ്‍ ചോര്‍ത്തലില്‍ കേന്ദ്രസര്‍ക്കാറിനെതിരെയുള്ള വിമര്‍ശനം ശക്തമാക്കി കോണ്‍ഗ്രസ് നേതാവ് രാഹുല്‍ ഗാന്ധി. ഫോണ്‍ ചോര്‍ത്തലില്‍ ജുഡീഷ്യല്‍ അന്വേഷണം വേണമെന്ന് രാഹുല്‍ ആവശ്യപ്പെട്ടു. ഇസ്‌റാഈല്‍ ഭീകരര്‍ക്കെതിരെ ആയുധമാക്കുന്ന പെഗാസസിനെ പെഗാസസിനെ മോദിയും അമിത് ഷായും രാജ്യത്തെ സ്ഥാപനങ്ങള്‍ക്കെതിരെ ഉപയോഗിക്കുന്നുവെന്നും അദ്ദേഹം കുറ്റപ്പെടുത്തി. പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും വിഷയത്തില്‍ പ്രതികരിക്കണമെന്നും രാഹുല്‍ ഗാന്ധി പറഞ്ഞു.

പെഗസസിനെ ഒരു ആയുധമായാണ് ഇസ്‌റാഈല്‍ കണക്കാക്കുന്നത് ഭീകരര്‍ക്കെതിരെയാണ് അവരിത് ഉപയോഗിക്കുന്നത്. എന്നാല്‍ പ്രധാനമന്ത്രിയും ആഭ്യന്തരമന്ത്രിയും ഇത് നമ്മുടെ രാജ്യത്തെ സ്ഥാപനങ്ങള്‍ക്കെതിരെ ഉപയോഗിക്കുകയാണെന്ന് രാഹുല്‍ കുറ്റപ്പെടുത്തി. ആഭ്യന്ത മന്ത്രി അമിത് ഷാ രാജിവെക്കണമെന്നും അദ്ദേഹം ആവശ്യപ്പെട്ടു.

പൗരന്‍മാരുടെ ഡാറ്റയുടെ സ്വകാര്യതയും സുരക്ഷിതത്വവുമാണ് ഞങ്ങളുടെ മുന്നിലുള്ള രണ്ട് അജണ്ടകളെന്ന് കോണ്‍ഗ്രസ് എം.പി ശശി തരൂരും പറഞ്ഞു.