ന്യൂഡല്‍ഹി: സ്വര്‍ണക്കടത്ത് കേസില്‍ ഇ.ഡി ഉദ്യോഗസ്ഥര്‍ക്കെതിരേ ക്രൈംബ്രാഞ്ച് ശേഖരിച്ച തെളിവുകള്‍ പരിശോധിക്കാന്‍ വിചാരണക്കോടതിക്ക് അനുമതി നല്‍കിയ ഹൈക്കോടതി വിധിക്കെതിരേ ഇ.ഡി സമര്‍പ്പിച്ച അപ്പീലില്‍ കേരളം സുപ്രിംകോടതിയില്‍ തടസഹരജി സമര്‍പ്പിച്ചു.ഹരജിയില്‍ തീരുമാനമെടുക്കും മുന്‍പ് തങ്ങളുടെ വാദം കേള്‍ക്കണമെന്നാണ് ആവശ്യം. സ്വര്‍ണക്കടത്ത് കേസില്‍ മുഖ്യമന്ത്രിക്കെതിരേ മൊഴി നല്‍കാന്‍ പ്രതികളായ സ്വപ്ന സുരേഷിനേയും സന്ദീപ് നായരേയും ഇ.ഡി ഭീഷണിപ്പെടുത്തിയെന്ന പേരില്‍ ഇ.ഡി ഉദ്യോഗസ്ഥര്‍ക്കെതിരേ ക്രൈം ബ്രാഞ്ച് രജിസ്റ്റര്‍ ചെയ്ത രണ്ട് കേസുകള്‍ ഹൈക്കോടതി സിംഗിള്‍ ബെഞ്ച് റദ്ദാക്കിയിരുന്നു.അതോടൊപ്പം ഇ.ഡിക്കെതിരേ ക്രൈം ബ്രാഞ്ച് ശേഖരിച്ച രേഖകളും തെളിവുകളും പരിശോധിക്കാന്‍ വിചാരണക്കോടതിക്ക് ഹൈക്കോടതി അനുമതി നല്‍കി. ഇതിനെതിരേ ഇ.ഡി ഡെപ്യൂട്ടി ഡയറക്ടര്‍ പി. രാധാകൃഷ്ണനാണ് സുപ്രിംകോടതിയില്‍ അപ്പീല്‍ നല്‍കിയത്.ഇ.ഡി ഉദ്യോഗസ്ഥര്‍ക്കെതിരായ കേസുകള്‍ റദ്ദാക്കിയ ഹൈക്കോടതി സിംഗിള്‍ ബെഞ്ച് വിധിക്കെതിരേ സംസ്ഥാന സര്‍ക്കാര്‍ ഡിവിഷന്‍ ബെഞ്ചില്‍ അപ്പീല്‍ നല്‍കിയിട്ടുണ്ട്.