നാസിക്: മഹാരാഷ്ട്രയിലെ നാസിക്കില്‍ ബസ്സിന് തീപ്പിടിച്ച് 11 പേര്‍ മരിച്ചു. 21 പേര്‍ക്ക് പരുക്കേറ്റു. നാസിക്-ഔറംഗബാദ് റോഡില്‍ പുലര്‍ച്ചെ 5.20 ഓടെയാണ് അപകടം. പരുക്കേറ്റവരെ പ്രദേശത്തെ വിവിധ ആശുപത്രികളിലേക്ക് മാറ്റി. മരണസംഖ്യ ഉയരാനിടയുണ്ട്.

മുംബൈയില്‍ നിന്നു യാത്രക്കാരുമായി പുറപ്പെട്ട സ്വകാര്യ ബസ് ധുലെയിലേക്ക് പോകുകയായിരുന്ന ട്രക്കുമായി കൂട്ടിയിടിച്ചശേഷം തീപ്പിടിക്കുകയായിരുന്നു. തീപ്പൊള്ളലേറ്റാണ് യാത്രക്കാര്‍ മരിച്ചതെന്ന് നാസിക് പൊലിസ് കമ്മീഷണര്‍ പറഞ്ഞു.

മരിച്ചവരുടെ കുടുംബങ്ങള്‍ക്ക് മുഖ്യമന്ത്രി അഞ്ചു ലക്ഷം രൂപ സഹായം പ്രഖ്യാപിച്ചു.