അഷറഫ് ചേരാപുരം

ദുബൈ • ജോലി നഷ്ടപ്പെട്ടാലും യു.എ.ഇയില്‍ ശമ്പളം ലഭിക്കും. ജോലി നഷ്ടപ്പെടുന്നവർക്ക് മൂന്നു മാസം ശമ്പളം തുടർന്നു ലഭിക്കുന്ന പുതിയ ഇന്‍ഷുറന്‍സ് പദ്ധതി രാജ്യത്ത് നിലവില്‍ വരുന്നതോടെയാണിത്. മാനവ വിഭവശേഷി സ്വദേശിവത്കരണ മന്ത്രാലയമാണ് ഈ സാമൂഹിക സുരക്ഷാപദ്ധതിയെക്കുറിച്ചുള്ള വിവരങ്ങള്‍ പുറത്തുവിട്ടത്. യു.എ.ഇ സെന്‍ട്രല്‍ ബാങ്ക് ലൈസന്‍സുള്ള ഇന്‍ഷുറന്‍സ് കമ്പനികളാണ് തൊഴിൽ നഷ്ട ഇന്‍ഷുറന്‍സ് നടപ്പാക്കുക.
പുതിയ ജോലി കണ്ടെത്തുന്നതു വരെയുള്ള കാലയളവില്‍ ജീവനക്കാരുടെ സംരക്ഷണം ലക്ഷ്യമിട്ടാണ് പദ്ധതി. ഇയില്‍ അംഗമായാല്‍ ശമ്പളത്തിന്റെ 60 ശതമാനമാണ് ജോലി നഷ്ടമായാലും ലഭിക്കുക. പരമാവധി മൂന്ന് മാസത്തേക്കോ അല്ലെങ്കില്‍ പുതിയ ജോലി ലഭിക്കുന്നതു വരെയോ പരിരക്ഷ കിട്ടും.

പരമാവധി 20,000 ദിര്‍ഹമാണ് ഒരു മാസം ലഭിക്കുക. ഇതിന്റെ ഗുണഭോക്താക്കള്‍ നിശ്ചിത തുക നല്‍കി ഇന്‍ഷുറന്‍സ് പദ്ധതിയില്‍ ചേരണം. ജോലിയില്‍ തുടര്‍ച്ചയായ 12 മാസമെങ്കിലും പൂര്‍ത്തിയായവര്‍ക്കാണ് പരിരക്ഷ. പദ്ധതിയില്‍ ചേരുന്ന ദിവസം മുതലാണ് കാലാവധി കണക്കാക്കുക. സ്വകാര്യ മേഖലയില്‍ ജോലി ചെയ്യുന്നവര്‍ക്കും ഫെഡറല്‍ സര്‍ക്കാര്‍ ജീവനക്കാര്‍ക്കും പദ്ധതിയില്‍ ചേരാം. എന്നാല്‍ അച്ചടക്ക നടപടിയുടെ ഭാഗമായി പിരിച്ചുവിടപ്പെട്ടവര്‍ക്കും നിയമവിരുദ്ധ പ്രവര്‍ത്തനം നടത്തിയവക്കും പരിരക്ഷയില്ല.സ്വന്തം ബിസിനസ് നടത്തുന്നവര്‍ക്കും നിക്ഷേപകര്‍ക്കും പദ്ധതിയില്‍ ചേരാനാവില്ല. പദ്ധതി പുതുവര്‍ഷത്തില്‍ നിലവില്‍ വരും.