ജിദ്ദ: സാമ്പത്തിക പ്രതിസന്ധിയെ തുടര്‍ന്ന് തൊഴില്‍ നഷ്ടമായി സഊദിയില്‍നിന്ന് ഇന്ത്യയിലേക്കു മടങ്ങുന്നവരുടെ എണ്ണം വര്‍ധിക്കുന്നു. അടുത്തമാസം 25നു മുന്‍പ് മടങ്ങുന്നവര്‍ക്കു മാത്രമേ ആനുകൂല്യങ്ങള്‍ ലഭ്യമാവുകയുള്ളൂവെന്ന മുന്നറിയിപ്പാണ് ഇവരെ മടങ്ങാന്‍ പ്രേരിപ്പിക്കുന്നത്. അല്ലാത്തവരുടെ ഉത്തരവാദിത്തം ഏല്‍ക്കാനാവില്ലെന്ന് വിദേശകാര്യമന്ത്രി സുഷമ സ്വരാജ് ട്വിറ്ററിലൂടെ മുന്നറിയിപ്പ് നല്‍കിയിരുന്നു.
നേരത്തേ ശമ്പളവും കുടിശ്ശിക ആനുകൂല്യങ്ങളും ലഭിക്കാതെ മടങ്ങില്ലെന്ന നിലപാടിലായിരുന്നു ഭൂരിഭാഗം തൊഴിലാളികളും. തുടക്കത്തില്‍ കൂടുതല്‍ പേര്‍ മടങ്ങാന്‍ താല്‍പര്യം പ്രകടിപ്പിച്ചെങ്കിലും തിരികെപോയാല്‍ ആനുകൂല്യങ്ങള്‍ ലഭിക്കുമോയെന്ന ആശങ്കയും തൊഴില്‍ വിസ നഷ്ടവുമാണ് പുനര്‍വിചിന്തനത്തിനു പ്രേരിപ്പിച്ചിരുന്നത്. ചില ജീവനക്കാര്‍ക്ക് അഞ്ചു ലക്ഷം റിയാല്‍ വരെ സര്‍വിസ് ആനുകൂല്യങ്ങള്‍ ലഭിക്കാനുണ്ട്.
നാട്ടിലേക്കു മടങ്ങുകയോ ജോലി മാറുകയോ വേണമെന്ന് രണ്ടാംതവണ ലേബര്‍ ക്യാംപുകള്‍ സന്ദര്‍ശിച്ച വിദേശകാര്യ സഹമന്ത്രി വി.കെ സിങ് തൊഴിലാളികളോട് നേരിട്ട് ആവശ്യപ്പെട്ടിരുന്നു. അതിനിടെ, മൂന്നു ഘട്ടങ്ങളിലായി ഇന്ത്യയിലേക്കു മടങ്ങിയവരുടെ എണ്ണം 300 കവിഞ്ഞു. ഇതില്‍ പത്തിലേറെ മലയാളികളുമുണ്ട്. ഇന്നലെ മൂന്നു മലയാളികളടക്കം നൂറോളം പേര്‍ സഊദി ഗവണ്‍മെന്റിന്റെ വിമാന ടിക്കറ്റിലാണ് മടങ്ങിയത്.
ജിദ്ദയില്‍ പ്രതിസന്ധിയിലായ 2,500 ഇന്ത്യക്കാരില്‍ രണ്ടായിരത്തോളം പേര്‍ മടക്ക ടിക്കറ്റിന് ഇന്ത്യന്‍ കോണ്‍സുലേറ്റില്‍ രജിസ്റ്റര്‍ ചെയ്തിട്ടുണ്ട്. ബാക്കിയുള്ളവര്‍ മറ്റു കമ്പനികളിലേക്കു മാറാനുള്ള പ്രാഥമിക നടപടികള്‍ കഴിഞ്ഞ് കാത്തിരിക്കുകയാണ്. പൂട്ടിയ ലേബര്‍ ക്യാംപുകളിലേക്ക്  ഭക്ഷണവും മറ്റും നല്‍കാന്‍ സന്നദ്ധ പ്രവര്‍ത്തകരും സഊദി മന്ത്രാലയവും തുടക്കത്തില്‍ കാണിച്ചിരുന്ന ആവേശം കുറഞ്ഞുവരുന്നതും ഇവരുടെ മടക്കത്തിന് ആക്കംകൂട്ടിയിട്ടുണ്ട്.