തിരുവനന്തപുരം:സ്വാശ്രയ മെഡിക്കല്‍ പ്രവേശനത്തില്‍ സര്‍ക്കാര്‍ ഇരുട്ടില്‍ തപ്പുകയാണെന്ന് പ്രതിപക്ഷ നേതാവ് രമേശ് ചെന്നിത്തല ആരോപിച്ചു. എന്തു ചെയ്യണമെന്ന് സര്‍ക്കാരിന് ഒരു പിടിയുമില്ലാത്ത അവസ്ഥയാണ്. പ്രശ്‌നപരിഹാരത്തിന് വ്യക്തമായ ധാരണ സര്‍ക്കാരിനില്ല. ഒരു വശത്ത് എല്ലാ സീറ്റുകളിലേക്കും പ്രവേശനം നടത്താന്‍ സര്‍ക്കാര്‍ നടപടി ആരംഭിച്ചിരിക്കുന്നു. മറുവശത്ത്  സ്വന്തംനിലയ്ക്ക് പ്രവേശനം നല്‍കാന്‍ മാനേജ്‌മെന്റുകളും നടപടി തുടങ്ങിക്കഴിഞ്ഞു. അവര്‍ പ്രവേശനത്തിന് പത്രപരസ്യവും നല്‍കിയിരിക്കുകയാണ്. രണ്ടു കൂട്ടരുടെയും വടംവലിക്കിടയില്‍ മെഡിക്കല്‍ പ്രവേശനം സ്വപ്നം കാണുന്ന ആയിരക്കണക്കിന്  കുട്ടികളും രക്ഷിതാക്കളുമാണ്  തീ തിന്നുന്നതെന്നും ചെന്നിത്തല പറഞ്ഞു.