ന്യൂഡല്‍ഹി: ഒന്‍പത് വര്‍ഷങ്ങള്‍ക്കു ശേഷം അഫ്‌സര്‍- ഫരീദ ദമ്പതികള്‍ക്ക് തങ്ങളുടെ പൊന്നു മോനെ തിരിച്ചു കിട്ടി. വര്‍ഷങ്ങള്‍ക്കു മുമ്പ് ഡല്‍ഹിയിലെ ബാബു ജഗജീവന്‍ റാം ആശുപത്രിയില്‍ ചികിത്സയ്ക്കായി വന്നപ്പോഴാണ് മകനെ നഷ്ടമാവുന്നത്. 2007ലായിരുന്നു സംഭവം.
ആശുപത്രിയില്‍ മരുന്നുവാങ്ങുന്നതിനിടെ ഒന്നരവയസുകാരനായ മകനെ ഒരു ബഞ്ചിലിരുത്തിയതായിരുന്നു. മരുന്നുവാങ്ങി തിരിഞ്ഞുനോക്കിയപ്പോള്‍ കുട്ടിയെ കാണാതായി. ആശുപത്രയില്‍ ഒരു സ്ത്രീ അടുത്തിരുന്ന് കുട്ടിയെ കളിപ്പിക്കുന്നത് ശ്രദ്ധയില്‍പ്പെട്ടിരുന്നു. അവരെയും കാണാതായി. കുട്ടിയെ കാണാതായതുമുതല്‍ അന്വേഷണത്തിലായിരുന്നു ഈ മാതാപിതാക്കള്‍.
നാലു മാസം മുമ്പ് ഡല്‍ഹി കൃഷ്ണ നഗറിലെ തന്റെ കുടുംബത്തില്‍ സന്ദര്‍ശനം നടത്തുകയായിരുന്ന ഇവരുടെ അയല്‍വാസിയായ ഒരു സ്ത്രീ ഫോട്ടോ ആല്‍ബത്തില്‍ കണ്ടു പരിചയമുള്ള കുട്ടിയെ അവിടെ ഒരു വീട്ടില്‍ കണ്ടെത്തുകയായിരുന്നു. കാണാതായ കുട്ടിയാണെന്ന സംശയത്തില്‍ വിവരം രക്ഷിതാക്കളെ അറിയിച്ചു. തുടര്‍ന്ന് മാസങ്ങളോളം നീണ്ട അന്വേഷണങ്ങള്‍ക്കും നിരീക്ഷണങ്ങള്‍ക്കും ശേഷമാണ് കുട്ടിയെ കൃത്യമായി തിരിച്ചറിയുകയും പൊലിസിന്റെ സഹായത്താല്‍ തിരികെ ലഭിക്കുകയും ചെയ്തത്. കിഴക്കന്‍ ഡല്‍ഹിയിലെ ജഹാംഗിര്‍ പുരി ശാന്തിമൊഹല്ലയില്‍ താമസിക്കുന്ന ദമ്പതികളില്‍ നിന്നാണ് കുട്ടിയെ കിട്ടിയത്. പത്തു വയസുകാരനായ കുട്ടി മുഹമ്മദ് സലിം നര്‍ഗീസ് ദമ്പതികളുടെ മകനായാണ് വളര്‍ന്നിരുന്നത്. ഇവരെ ചോദ്യം ചെയ്തപ്പോള്‍ ആദ്യം സമ്മതിച്ചില്ലെങ്കിലും പിന്നീട് മക്കളില്ലാത്ത തങ്ങള്‍ കുട്ടിയെ തട്ടിക്കൊണ്ടുവരികയായിരുന്നുവെന്ന് സമ്മതിക്കുകയായിരുന്നു.