അമ്പലപ്പുഴ: ബസില്‍ കവര്‍ച്ച നടത്താന്‍ ശ്രമിച്ച മൂന്നു തമിഴ്‌നാട് സ്വദേശികളായ യുവതികള്‍ അറസ്റ്റില്‍. തമിഴ്‌നാട് മേട്ടുപ്പാളയം സ്വദേശിനികളായ രമ്യ (31) മുരുകമ്മ (32). രാസാത്തി (20) എന്നിവരെയാണ് പുന്നപ്ര എസ്.ഐ ഇ.ഡി ബിജുവിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്. ഇന്നലെ രാവിലെ 11 ഓടെ കായംകുളം ആലപ്പുഴ കെ.എസ്.ആര്‍.ടി.സി ബസില്‍ വെച്ചായിരുന്നു സംഭവം.
അമ്പലപ്പുഴയില്‍ നിന്നും ആലപ്പുഴയിലേക്ക് യാത്ര ചെയ്തിരുന്ന തകഴി കുന്നുമ്മപുത്തന്‍പുരയില്‍ പത്മിനിയുടേയും അയല്‍വാസിയായ കുന്നുമ്മ വാഴത്തറ വീട്ടില്‍ അന്നമ്മയുടേയും ബാഗില്‍ നിന്നും പണം അപഹരിക്കാന്‍ ശ്രമിക്കുന്നതിനിടെയാണ് ഇവരെ ഉടമകള്‍ തന്നെ കവര്‍ച്ചക്കാരെ പിടികൂടിയത്.
ഇതേ ബസില്‍ തന്നെ പുന്നപ്ര സ്റ്റേഷനില്‍ എത്തിക്കുകയായിരുന്നു. അന്നമ്മയുടെ ബാഗില്‍ നിന്നും 200 രൂപ അപഹരിച്ച ഇവര്‍ പിന്നീട് പത്മിനിയുടെ ബാഗില്‍ സൂക്ഷിച്ചിരുന്ന 15,000 രൂപ സിബ് അടര്‍ത്തിമാറ്റി കവര്‍ന്നെടുക്കുകയായിരുന്നു. കാക്കാഴം മേല്‍പ്പാലത്തില്‍ വെച്ചായിരുന്നു കവര്‍ച്ച.
ഇത് ശ്രദ്ധയില്‍പ്പെട്ട അന്നമ്മ കവര്‍ച്ചക്കാരെ അടിച്ചു വീഴ്ത്തുകയായിരുന്നു. ഇവരെ വിശദമായി പരിശോധിച്ചപ്പോള്‍ മോഷണ മുതലായ എ.ടി.എം കാര്‍ഡ്, ഒമാന്‍ റിയാല്‍, യു.എ.ഇ ദര്‍ഹം, 1000 രൂപ എന്നിവ കണ്ടെത്തി ഇവരെ. ഇന്ന് കോടതിയില്‍ ഹാജരാക്കും. എസ്.ഐക്ക് ഒപ്പം സിവില്‍ പൊലിസ് ഓഫീസര്‍മാരായ അഗസ്റ്റിന്‍, പ്രതീപ്, ഷൈനിമോള്‍, അനുമോള്‍ എന്നിവരും ഉണ്ടായിരുന്നു.