സ്വന്തം ലേഖകന്‍

തിരുവനന്തപുരം: തല്ലിപ്പിളര്‍ന്നു രണ്ടായ ഐ.എന്‍.എല്ലിനെ 'പുറത്താക്കി' സി.പി.എം. സര്‍ക്കാര്‍ പരിപാടിയില്‍ നിന്നും മന്ത്രിയേയും പാര്‍ട്ടി പ്രതിനിധിയേയും ഒഴിവാക്കി. ചൊവ്വാഴ്ച തിരുവനന്തപുരം ഗോര്‍ക്കി ഭവനില്‍ നടക്കുന്ന ജനകീയാസൂത്രണ രജത ജൂബിലി പരിപാടിയില്‍ നിന്നാണ് ഐ.എന്‍.എല്ലിനെ ഒഴിവാക്കിയത്. യു.ഡി.എഫിലെ ഘടകകക്ഷിയായ സി.എം.പിയെയും സ്‌കറിയാ തോമസ് വിഭാഗത്തിനെയും ബി.ജെ.പി ഉള്‍പ്പെടെ എല്ലാ പാര്‍ട്ടികളുടെയും പ്രതിനിധികളെ ക്ഷണിച്ചിട്ടും മന്ത്രിസഭാ പ്രാതിനിധ്യമുള്ള ഘടകകക്ഷിയായ ഐ.എന്‍.എല്ലിനെ ഒഴിവാക്കുകയായിരുന്നു. ഒന്നാകാന്‍ സി.പി.എം അന്ത്യശാസനം നല്‍കിയിട്ടും തമ്മിലടി തുടരുന്ന ഐ.എന്‍.എല്ലിനെ സര്‍ക്കാര്‍ പരിപാടികളില്‍ നിന്നും പൂര്‍ണമായും മാറ്റി നിര്‍ത്താനാണ് സി.പി.എം തീരുമാനം. അടുത്ത എല്‍.ഡി.എഫ് യോഗത്തിനു മുന്‍പ് പാര്‍ട്ടിയില്‍ അനുരഞ്ജനമുണ്ടായില്ലെങ്കില്‍ യോഗത്തില്‍ നിന്നും പുറത്താക്കാനും ഐ.എന്‍.എല്‍ പ്രതിനിധിയെ മന്ത്രിസഭയില്‍ നിന്നും ഒഴിവാക്കാനും നീക്കമുണ്ട്. 

 

  2006 മുതല്‍ ഇടതു മന്ത്രിസഭയുടെ കാലത്ത് പ്രാധിനിത്യം നല്‍കിയിരുന്ന ഹജ്ജ് കമ്മിറ്റി പുനഃസംഘടിപ്പിച്ചപ്പോഴും ഐ.എന്‍.എല്ലിനെ സി.പി.എം അടുപ്പിച്ചിരുന്നില്ല. കൂടാതെ ബോര്‍ഡ്, കോര്‍പറേഷന്‍ ചെയര്‍മാന്‍ സ്ഥാനത്തേക്ക് ഐ.എന്‍.എല്‍ പ്രതിനിധികളെ പരിഗണിക്കേണ്ടെന്നും തീരുമാനിച്ചിട്ടുണ്ട്. 

 

 കൊച്ചിയില്‍ നടന്ന യോഗത്തില്‍ ഐ.എന്‍.എല്ലിലെ ഇരു വിഭാഗവും തല്ലിപിരിഞ്ഞപ്പോള്‍ സംസ്ഥാന പ്രസിഡന്റ് എ.പി അബ്ദുല്‍വഹാബിനെയും ജനറല്‍ സെക്രട്ടറി കാസിം ഇരിക്കൂറിനെയും എ.കെ.ജി സെന്ററില്‍ വിളിച്ചുവരുത്തി എ.വിജയരാഘവനും മുഖ്യമന്ത്രി പിണറായി വിജയനും കോടിയേരി ബാലകൃഷ്ണനും ചര്‍ച്ച നടത്തിയിരുന്നു. രണ്ടു വിഭാഗവും ഒരുമിച്ച് പോകണമെന്നും ഇല്ലെങ്കില്‍ മന്ത്രിയെ പിന്‍വലിക്കുന്നത് ഉള്‍പ്പെടെയുള്ള നടപടികളിലേക്ക് പോകുമെന്നും മുന്നറിയിപ്പ് നല്‍കിയിരുന്നു. എന്നാല്‍ പിന്നീടും പാര്‍ട്ടിയുടെ യൂത്തു വിങ് അടക്കം പിളരുകയും നേതാക്കള്‍ അനുരഞ്ജനത്തിലേക്ക് വരുകയും ചെയ്യാത്തതാണ് ഇപ്പോള്‍ സി.പി.എമ്മിനെ ചൊടിപ്പിച്ചിരിക്കുന്നത്. 

 നീണ്ട കാത്തിരിപ്പിനൊടുവിലാണ് ഐ.എന്‍.എല്ലിന് ഇടതു മുന്നണിയില്‍ പ്രവേശനം നല്‍കിയത്. ഏക എം.എല്‍.എയായ അഹമ്മദ് ദേവര്‍കോവിലിനെ രണ്ടര വര്‍ഷം മന്ത്രി സ്ഥാനവും നല്‍കി. കൂടാതെ പാര്‍ട്ടിക്ക് ഒരു പി.എസ്.സി അംഗത്വവും നല്‍കിയിരുന്നു.