കണ്ണൂര്‍: ഗവര്‍ണര്‍ ആരിഫ് മുഹമ്മദ് ഖാനെതിരെ പ്രമേയം പാസാക്കി കണ്ണൂര്‍ സര്‍വകലാശാലാ സിന്‍ഡിക്കേറ്റ്. കണ്ണൂര്‍ അടക്കം സംസ്ഥാനത്തെ ഒന്‍പത് സര്‍വകലാശാലകളിലെ വി.സിമാരോട് രാജി ആവശ്യപ്പെട്ട ഗവര്‍ണറുടെ നടപടി ഉന്നത വിദ്യാഭ്യാസ മേഖലയെ സ്തംഭിപ്പിക്കാനുള്ള നീക്കമെന്ന് പ്രമേയത്തില്‍ ആരോപിക്കുന്നു. ചാന്‍സലര്‍ കൂടിയായ ഗവര്‍ണര്‍ക്കെതിരെ ഒരു സര്‍വകലാശാല സിന്‍ഡിക്കേറ്റ് പ്രമേയം പാസാക്കുന്നത് അസാധാരണമാണ്. സിന്‍ഡിക്കേറ്റ് അംഗവും സി.പി.എം കണ്ണൂര്‍ ജില്ലാ സെക്രട്ടറിയേറ്റ് അംഗവുമായ എം.സുകന്യയാണ് യോഗത്തില്‍ പ്രമേയം അവതരിപ്പിച്ചത്.

സര്‍വകലാശാലാ സംബന്ധമായ 26ഓളം ഭേദഗതികള്‍ ഒന്നും അംഗീകരിക്കാതെ ഗവര്‍ണര്‍ പിടിച്ചുവച്ചിരിക്കുന്നത് സര്‍വകലാശാലാ ഭരണനിര്‍വഹണത്തിനു പോലും തടസമുണ്ടാകുന്ന സ്ഥിതയാണെന്നും കേരളത്തെ ഒരു വൈജ്ഞാനിക സമ്പദ്ഘടനയാക്കാനുള്ള നടപടികള്‍ ആരംഭിച്ചിരിക്കുന്നതിനിടയില്‍ കണ്ണൂര്‍ സര്‍വകലാശാലയുടേതടക്കമുള്ള വി.സിമാരോട് ഗവര്‍ണര്‍ ചട്ടവിരുദ്ധമായി രാജി ആവശ്യപ്പെട്ടത് തികച്ചും അനുചിതമാണെന്നും പ്രമേയത്തില്‍ ആരോപിക്കുന്നു.പ്രമേയത്തിന് സിന്‍ഡിക്കേറ്റ് അംഗീകാരം നല്‍കിയിട്ടുണ്ട്.