കണ്ണൂര്‍: ഒന്നാം വര്‍ഷ വിദ്യാര്‍ത്ഥിയെ റാഗ് ചെയ്തെന്ന പരാതിയുടെ അടിസ്ഥാനത്തില്‍ അലന്‍ ഷുഹൈബിനെ കസ്റ്റഡിയിലെടുത്ത് പൊലിസ്. കണ്ണൂര്‍ പാലയാട് ക്യാമ്പസില്‍ വെച്ച് അഥിന്‍ എന്ന ഒന്നാം വര്‍ഷ വിദ്യാര്‍ത്ഥിയെ അലന്‍ ഷുഹൈബിന്റെ നേതൃത്വത്തിലുള്ള സംഘം റാഗു ചെയ്തു എന്നാണ് പരാതി.എസ.്എഫ്.ഐ യുടെ പരാതിയുടെ അടിസ്ഥാനത്തിലാണ് അലനെ കസ്റ്റഡിയിലെടുത്തിരിക്കുന്നത്.

എന്നാല്‍ റാഗിങ് പരാതി നല്‍കി എസ്.എഫ്.ഐ പക വീട്ടുകയാണെന്നാണ് അലന്‍ ഷുഹൈബിന്റെ ആരോപണം. എസ്എഫ്ഐ പ്രവര്‍ത്തകര്‍ തന്നെ മര്‍ദ്ദിച്ചെന്നും അലന്‍ ഷുഹൈബ് കുറ്റപ്പെടുത്തുന്നു. എന്നാല്‍ അഥിനെ റാഗ് ചെയ്തത് ചോദ്യം ചെയ്തതാണ് സംഘര്‍ഷത്തിലേക്ക് നയിച്ചതെന്നും, അലനെ മര്‍ദ്ദിച്ചിട്ടില്ലെന്നും എസ്.എഫ്.ഐ വ്യക്തമാക്കി. കഴിഞ്ഞവര്‍ഷം ഉണ്ടായ റാഗിങ്ങുമായി ബന്ധപ്പെട്ട വിഷയമാണ് സംഘര്‍ഷത്തിലേക്ക് നയിച്ചതെന്നാണ് പൊലീസ് പറയുന്നത്. പരിക്കേറ്റ അഥിന്‍ ഇപ്പോഴും ചികിത്സയിലാണെന്നും എസ്എഫ്ഐ പ്രവര്‍ത്തകര്‍ പറയുന്നു. ഈ വിഷയത്തില്‍ ക്യാമ്പസില്‍ രാവിലെ മുതല്‍ രണ്ടു വിഭാഗം വിദ്യാര്‍ത്ഥികള്‍ തമ്മില്‍ സംഘര്‍ഷാവസ്ഥ നിലനിന്നിരുന്നു. പന്തീരാങ്കാവ് യുഎപിഎ കേസില്‍ ജയിലിലായിരുന്ന അലന്‍ ഷുഹൈബ് ജാമ്യത്തിലിറങ്ങിയിരുന്നു.