ചെന്നൈ: തമിഴ്‌നാട്ടില്‍ സ്വാശ്രയ എം.ബി.ബി.എസ് സീറ്റുകള്‍ക്ക് ഫീസ് കുത്തനെ കൂട്ടി. സ്വകാര്യ കോളജുകളും ഡീംഡ് യൂനിവേഴ്‌സിറ്റികളും ഫീസ് ഇരട്ടിയാക്കി വര്‍ധിപ്പിക്കുകയായിരുന്നു. നീറ്റ് ഫലം സി.ബി.എസ്.ഇ പ്രസിദ്ധീകരിച്ചതിനുശേഷമാണ് ഫീസ് കൂട്ടിയത്. ട്യൂഷന്‍ ഫീസ് ഒരു കോടി രൂപയും ക്യാപ്പിറ്റേഷന്‍ ഫീസ് 85 ലക്ഷം രൂപയും വരെ എന്നാണ് നിലവിലെ കണക്ക്. ഇത് 1.85 കോടി രൂപയും 2.85 കോടിയുമായി  വര്‍ധിക്കും. എല്ലാ സ്വാകാര്യ കോളജുകള്‍ക്കും ഡീംഡ് സര്‍വകലാശാലകള്‍ക്കും നീറ്റ് മെറിറ്റ് ബാധകമാക്കിയിട്ടുണ്ട്.
വിദ്യാര്‍ഥികള്‍ക്ക് ഏത് കോളജില്‍ വേണമെങ്കിലും അപേക്ഷിക്കാമെങ്കിലും നീറ്റിന്റെ അടിസ്ഥാനത്തിലായിരിക്കും പ്രവേശനം. പല കോളജുകളും രക്ഷിതാക്കളോട് ക്യാപ്പിറ്റേഷന്‍ ഫീസ് ആവശ്യപ്പെട്ടിട്ടുണ്ട്. 40 ലക്ഷം മുതല്‍ 85 ലക്ഷം രൂപ വരെയാണ് തലവരിപ്പണമായി ചോദിക്കുന്നത്.