ഫര്‍സാന കെ

2006 ജൂണ്‍ ഒമ്പത്, ബീച്ചില്‍ സായാഹ്നം ചെലവഴിക്കാനെത്തിയതായിരുന്നു ബൈത്ത് ലാഹിയയിലെ ഗാലിയ കുടുംബം. മെഡിറ്ററേനിയന്‍ കടലിന്റെ നീലത്തിരയോളങ്ങള്‍ ചുംബിക്കുന്ന അതിമനോഹര കടല്‍ത്തീരമുണ്ട് ഗസ്സയ്ക്ക്. കുട്ടികളോടൊപ്പം സ്വസ്ഥമായി കളിക്കാന്‍ ഒന്നാസ്വദിക്കാന്‍, ആളധികമില്ലാത്ത വെള്ളമണല്‍ നിറഞ്ഞ ഒരുഭാഗമാണ് അവര്‍ തിരഞ്ഞെടുത്തത്. കടലോളങ്ങള്‍ തൊട്ടും തിരയിളക്കങ്ങള്‍ക്കൊപ്പം പൊട്ടിച്ചിരിച്ചും കളിരസങ്ങളിലായിരുന്നു കുഞ്ഞുങ്ങള്‍. ഇതെല്ലാംകണ്ട് സന്തോഷത്തോടെ അവര്‍ക്കു ഭക്ഷിക്കാന്‍ ചോളം ചുട്ടെടുക്കുകയായിരുന്നു കര്‍ഷകനായ അവരുടെ അലി ഗാലിയ. ആ സന്തോഷത്തിന്റെ ആ ആരവങ്ങളിലേക്കാണ് പൊടുന്നനെ ഇസ്‌റാഈലി പടക്കപ്പലില്‍ നിന്നുള്ള മിസൈല്‍ വന്നുപതിച്ചത്. ഗാലിയ കുടുംബത്തിലെ ഏഴുപേര്‍ ആ കടല്‍ത്തീരത്ത് പിടഞ്ഞുമരിച്ചു. അലി ഗാലിയ (43), ഭാര്യ റഈസ (36), മക്കളായ ആലിയ (24), ഇല്‍ഹാം (15), സബ്‌റീന്‍ (07), ഹനാദി (02), ഹൈതം (എട്ടുമാസം) എന്നിവര്‍. 11കാരി ഹുദ മാത്രം രക്ഷപ്പെട്ടു.

ബീച്ചിലുണ്ടായിരുന്ന മുപ്പതോളം പേര്‍ക്ക് പരുക്കേല്‍ക്കുകയും ചെയ്തു. തന്റെ ഉപ്പയും ഉമ്മയും ഉടപ്പിറപ്പുകളും മണലില്‍ രക്തംവാര്‍ന്ന് വീണുകിടക്കുന്നതു കണ്ട ഹുദ, ഉപ്പയുടെ മൃതദേഹത്തിനടുത്തു മണലില്‍ തലയടിച്ച് 'അബൂയാ, അബൂയാ' എന്ന് ആര്‍ത്ത് നിലവിളിക്കുന്നതിന്റെ വിഡിയോ ദൃശ്യങ്ങള്‍ ലോകമാധ്യമങ്ങള്‍ പ്രക്ഷേപണം ചെയ്തു. അതൊരു സോഷ്യല്‍ മീഡിയാ കാലമല്ലാത്തതിനാല്‍ വൈറല്‍ ആയില്ലെന്നു മാത്രം. ഇതാണു ഗസ്സ. യുദ്ധം നിങ്ങള്‍ തുടങ്ങിവച്ചതു കൊണ്ടല്ലേ അനുഭവിക്കേണ്ടിവന്നതെന്നും യുദ്ധം ആരു ചെയ്താലും ന്യായീകരിക്കാനാവില്ലെന്നും സമാധാന വാദികള്‍ സമദൂരം തീര്‍ക്കുന്ന ഗസ്സ.

2021ലെ മറ്റൊരു സംഭവം. കിഴക്കന്‍ ജറൂസലമിലെ ശൈഖ് ജര്‍റാഹില്‍ യാസിര്‍ കുടുംബത്തെ പുറത്താക്കാന്‍ ഇസ്‌റാഈലി പൊലിസ് വന്‍ സന്നാഹങ്ങളുമായി വരുന്നു. ഉടന്‍ വീടുവിട്ടൊഴിയാന്‍ ആവശ്യപ്പെടുന്നു. എന്നാല്‍ ഇതു തലമുറകളായി തങ്ങള്‍ താമസിക്കുന്ന വീടാണെന്നും ഒഴിയാന്‍ മനസില്ലെന്നും പറഞ്ഞു യാസിര്‍. പിന്നീടു കണ്ടത് സമാനതകളില്ലാത്ത ക്രൂരത. യാസിറിനെയും സഹോദരന്‍ മര്‍വാനെയും പൊലിസ് വലിയ ഇരുമ്പുദണ്ഡുകൊണ്ട് നിഷ്‌കരുണം അടിക്കാന്‍ തുടങ്ങി. ആ വീട്ടിലെ ഫര്‍ണിച്ചറുകളും മറ്റും നശിപ്പിച്ചു. പേടിച്ചരണ്ട പിഞ്ചുകുഞ്ഞുങ്ങളും സ്ത്രീകളും കിടപ്പുമുറിയില്‍ കയറി വാതിലടച്ചു. നിരപരാധികളും നിരായുധരുമായ ആ കുടുംബത്തെ മുഴുവന്‍ നിമിഷനേരം കൊണ്ടവര്‍ തല്ലിച്ചതച്ചു. കൈയും കാലും ഒടിഞ്ഞ ഗൃഹനാഥനും പേടിച്ചരണ്ട സ്ത്രീകളും കുട്ടികളും എങ്ങോട്ടു പോകണമെന്നറിയാതെ തെരുവില്‍ അഭയം തേടി.

കുഞ്ഞുദുര്‍റയെ മറന്നുകാണില്ല നമ്മള്‍. ഒരു വീപ്പയ്ക്കു പിന്നില്‍ ഭയന്നുറഞ്ഞ മുഖത്തോടെ ഇസ്‌റാഈല്‍ നരാധമന്‍മാര്‍ക്കു മുന്നില്‍ ജീവനുവേണ്ടി യാചിക്കുന്ന 11കാരന്റെ മുഖം മറക്കാനാവില്ല. രണ്ടാം ഇന്‍തിഫാദ പൊട്ടിപ്പുറപ്പെട്ട 2000ത്തിലാണ് ദുര്‍റ കൊല്ലപ്പെട്ടത്.

സെപ്റ്റംബര്‍ 28, ഗസ്സാ തെരുവ് വിജനമാണ്. യു.എന്നിനു കീഴിലുള്ള ബുര്‍ജി അഭയാര്‍ഥി ക്യാംപില്‍ വസിക്കുന്ന ജമാല്‍ ദുര്‍റ മകന്‍ മുഹമ്മദ് ദുര്‍റയെയും കൂടെക്കൂട്ടി പുറത്തേക്കിറങ്ങിയതാണ്. വീട്ടാവശ്യത്തിനുള്ള സാധനങ്ങള്‍ വാങ്ങാനാണ് ജമാല്‍ മകനെയും കൂട്ടിയിറങ്ങിയത്. ഗസ്സാ മുനമ്പില്‍നിന്ന് അഞ്ചു കിലോമീറ്റര്‍ മാത്രം അടുത്തുള്ള നെതുസറിം എന്ന കൊച്ചുപട്ടണമാണിത്. സാധനങ്ങള്‍ വാങ്ങിയശേഷം റോഡില്‍ കല്ലുകള്‍കൊണ്ട് തടസം സൃഷ്ടിച്ചതിനാല്‍ ടാക്‌സി നിര്‍ത്തിച്ച് വീട്ടിലേക്കുള്ള ബാക്കി ഒരു കിലോമീറ്റര്‍ നടക്കുകയായിരുന്നു ജമാലും മകനും. പെട്ടെന്നാണ് ആയുധമേന്തി നില്‍ക്കുന്ന ഇസ്‌റാഈലി സൈന്യത്തെ ജമാല്‍ കാണുന്നത്. ഇതോടെ ജമാല്‍ മകനെയും കൂട്ടി റോഡരികിലെ വീപ്പയ്ക്കു പിന്നില്‍ ഒളിച്ചു. 40 മിനുട്ടോളം സമയമാണ് മകനെ ചേര്‍ത്തുപിടിച്ച് ഭയവിഹ്വലനായി ജമാല്‍ അവിടെ ഒളിച്ചുകഴിഞ്ഞത്.

എന്നാല്‍, കൂടുതല്‍ ഒളിച്ചിരിക്കാനായില്ല. അധിനിവേശ സൈന്യം രണ്ടുപേരെയും കണ്ടുപിടിച്ചു. വൈകാതെ വെടിപൊട്ടി. ആദ്യ ബുള്ളറ്റ് ദുര്‍റയുടെ കാലില്‍ കൊണ്ടു. അലറിക്കരയുന്നതിനിടെ അടുത്തതും വന്നു, ദുര്‍റയുടെ ഇളംനെഞ്ചിലേക്കു തുളച്ചുകയറി. നിസ്സഹായനായ ജമാലിന്റെ മടിയില്‍കിടന്ന് ദുര്‍റ ഒന്നു പിടയുകമാത്രം ചെയ്തു. ഫ്രാന്‍സ് ടു ചാനലിന്റെ തലാല്‍ അബൂറഹ്മ കാമറയില്‍ പകര്‍ത്തിയതുകൊണ്ട് മാത്രം പുറംലോകത്തെത്തിയ സംഭവം. ദുര്‍റയുടെ ദാരുണകൊലപാതകം കണ്ട് ലോകം നടുങ്ങി. നിഷ്ഠുരമായ കൊലപാതത്തിനെതിരേ വലിയതോതില്‍ ജനരോഷം ഉയര്‍ന്നതോടെ, കൈയബദ്ധം എന്നായിരുന്നു ഇസ്‌റാഈലി പ്രതികരണം.