ദുബൈ: ഇന്ത്യന്‍ ടെന്നിസ് താരം സാനിയ മിര്‍സ ദുബൈയില്‍ ടെന്നിസ് സെന്ററുകള്‍ തുറന്നു. ദുബൈയില്‍ രണ്ട് ടെന്നിസ് സെന്ററുകള്‍ തുറന്ന സാനിയ സ്‌പോര്‍ട്‌സ് കൗണ്‍സിലുമായുള്ള സഹകരണത്തിന്റെ ഭാഗമായി ദുബൈ സ്‌പോര്‍ട്‌സ് കൗണ്‍സില്‍ സന്ദര്‍ശിച്ചു. മന്‍ഖൂല്‍, ജുമൈറ ലേക് ടവര്‍ എന്നിവിടങ്ങളിലാണ് സാനിയയുടെയും ഭര്‍ത്താവ് പാകിസ്താന്‍ ക്രിക്കറ്റ് താരം ശുഐബ് മാലിക്കിന്റെയും ടെന്നിസ് സെന്ററുകള്‍ ഉള്ളത്. മികച്ച നിലവാരത്തില്‍ രൂപകല്‍പ്പന ചെയ്ത അടിസ്ഥാന സൗകര്യങ്ങളുടെ ലഭ്യത കാരണം താമസിക്കാനും നിക്ഷേപം നടത്താനുമുള്ള ഏറ്റവും നല്ല സ്ഥലമാണ് ദുബൈ എന്ന് സാനിയ പറഞ്ഞു. ദുബൈയിലും യു.എ.ഇയുടെ മറ്റ് ഭാഗങ്ങളിലും ടെന്നീസ് സെന്ററുകള്‍ സ്ഥാപിക്കുക എന്നതാണ് ലക്ഷ്യം. വിവിധ രാജ്യങ്ങളില്‍ അക്കാദമികള്‍ തുടങ്ങാന്‍ നിരവധി ഓഫറുകള്‍ ലഭിച്ചിട്ടുണ്ട്. ദുബൈ സ്‌പോര്‍ട്‌സ് കൗണ്‍സില്‍ സെക്രട്ടറി ജനറല്‍ സഈദ് ഹര്‍ബ്, അസിസ്റ്റന്റ് സെക്രട്ടറി ജനറല്‍ നാസര്‍ അമാന്‍ അല്‍ റഹ്‌മാ എന്നിവര്‍ ചേര്‍ന്ന് സാനിയയെ സ്വീകരിച്ചു.