ഹരിയാന സര്‍ക്കാരിന്റെ വിജ്ഞാപനം റദ്ദാക്കി

ന്യൂഡല്‍ഹി: ഒ.ബി.സി വിഭാഗത്തെ സമ്പത്തിന്റെ അടിസ്ഥാനത്തില്‍ രണ്ടായി തിരിച്ച് സംവരണാനുകൂല്യം നല്‍കിയ ഹരിയാന സര്‍ക്കാര്‍ നടപടി സുപ്രിംകോടതി റദ്ദാക്കി. സംവരണ വിഭാഗത്തിനുള്ളില്‍ സാമ്പത്തിക തരംതിരിവ് വേണ്ടെന്ന് ചൂണ്ടിക്കാട്ടിയാണ് എല്‍.നാഗേശ്വര റാവു, അനിരുദ്ധ് ബോസ് എന്നിവരടങ്ങിയ ബെഞ്ചിന്റെ വിധി. എന്നാല്‍, ഈ ഉത്തരവ് പ്രകാരം ഇതുവരെ നടത്തിയ നിയമനങ്ങളും പ്രവേശനങ്ങളും അതുപോലെ തുടരാം. പുതിയ വിജ്ഞാപനം മൂന്ന് മാസത്തിനുള്ളില്‍ പുറത്തിറക്കണമെന്നും ഹരിയാന സര്‍ക്കാരിന് കോടതി നിര്‍ദേശം നല്‍കി.

 

ഒ.ബി.സി സംവരണവുമായി ബന്ധപ്പെട്ട് 2016 ഓഗസ്റ്റ് 17ന് ഹരിയാന സര്‍ക്കാര്‍ പുറത്തിറക്കിയ വിജ്ഞാപനത്തിന്റെ അടിസ്ഥാനത്തിലാണ് കേസ്. ഉത്തരവ് പ്രകാരം ഒ.ബി.സിക്കാരിലെ ക്രീമിലെയറില്‍പ്പെടാത്ത വിഭാഗങ്ങളെ പ്രതിവര്‍ഷം വരുമാനം മൂന്നുലക്ഷം വരെയുള്ളവര്‍, ആറ് ലക്ഷം വരെയുള്ളവര്‍ എന്നിങ്ങനെ രണ്ടായി തരം തിരിച്ചു. മൂന്നുലക്ഷം വരെ പ്രതിവര്‍ഷ വരുമാനമുള്ളവര്‍ക്ക് ജോലി, വിദ്യാലയങ്ങളിലെ പ്രവേശനം തുടങ്ങിയവയില്‍ മുന്‍ഗണന നല്‍കി. ഇതിനെതിരേ പിച്ച്‌റ വാര്‍ഗ് കല്യാണ്‍ മഹാസഭാ ഹരിയാന എന്ന സംഘടന നല്‍കിയ ഹരജിയില്‍, സര്‍ക്കാരിന്റെ വിജ്ഞാപനം ഭരണഘടനാവിരുദ്ധമെന്ന് 2018ല്‍ പഞ്ചാബ്-ഹരിയാന ഹൈക്കോടതി വിധിച്ചു. 

ഈ ഉത്തരവാണ് ഇപ്പോള്‍ സുപ്രിംകോടതി ശരിവച്ചത്.