മലയിന്‍കീഴ്: ഓണം കൊഴുപ്പിക്കാന്‍ വട്ടിപലിശയ്ക്ക് പണം നല്‍കാന്‍ സ്വദേശത്തെയും തമിഴ്‌നാട്ടിലെയും കഴുത്തറുപ്പന്‍ പലിശ സംഘം എത്തി.
പൊലിസ് റെയിഡിനെ തുടര്‍ന്ന് ഒതുങ്ങിയിരുന്ന സംഘങ്ങള്‍ വീണ്ടും രംഗത്തു വന്നിരിക്കുന്നത് ഓണം എത്തിയതോടെയാണ്. ഓണത്തിന് സാധാരണക്കാരും ഇടനിലക്കാരും പണം വാങ്ങാന്‍ എത്തുന്നതിനാല്‍ ഇരുപതിലേറെ തമിഴ് സംഘങ്ങള്‍ രംഗത്തു വന്നിരിക്കുന്നു. ദിവസവും ഇവര്‍ വീട്ടിലോ കടയിലോ എത്തി പിരിക്കുകയും കിട്ടിയില്ലെങ്കില്‍ ഭീഷണിയുമാവും. ഇവരുടെ പണം എവിടെ നിന്ന് വരുന്നെന്നോ അതിന്റെ ഉറവിടം എവിടെയാണന്നോ തിരക്കാന്‍ അധികൃതര്‍ തയാറാവാറില്ല. ഇവിടെ കള്ളനോട്ടുകള്‍ എത്തുന്നത് ഇവര്‍ വഴിയാണെന്ന് പരാതി ഉയര്‍ന്നിട്ടുണ്ട്. ചന്തകളിലും മറ്റും പുലര്‍കാല കച്ചവടമാണ് നടക്കുന്നത്. അതിനാല്‍ കള്ളനോട്ടുകള്‍ മാറാനും സൗകര്യമേറെയാണ്.