ദമാം: നിയമ പഠനത്തെ പ്രോത്സാഹിപ്പിക്കുന്നതിനും പിന്നാക്ക ന്യുന പക്ഷ വിഭാഗങ്ങളുടെ വിദ്യാഭ്യാസ – തൊഴിൽ പരമായ സാമൂഹിക ശാക്തീകരണവും ലക്‌ഷ്യം വെച്ചു ഉന്നത നിയമ പഠന മേഖലയിലെ ഉദ്യോഗാർത്ഥികൾക്ക് ജുഡീഷ്യൽ സർവീസ് സ്കോളർഷിപ്പുമായി സമസ്ത ഇസ്‌ലാമിക് സെന്റർ ദമാം സെൻട്രൽ കമ്മിറ്റി. ലീഗൽ എഡ്യുകേഷൻ ആൻഡ് എംപവർമെൻറ് ഡ്രൈവ് (ലീഡ്) എന്ന് നാമ കരണം നൽകിയ പദ്ധതിയുടെ ഭാഗമായി നടപ്പാക്കുന്ന സ്കോളർ ഷിപ്പ് എസ്‌കെഎസ്എസ്എഫ് സംസ്ഥാന കമ്മിറ്റി നടപ്പിലാക്കി വരുന്ന കമ്മ്യുണിറ്റി ഡെവലപ്മെന്റ്പ്രോഗ്രാമിന്റെ ഭാഗമായി ഉൾപ്പെടുത്തിയാണ് പ്രായോഗികമാക്കുക.

മുൻസിഫ് മജിസ്ട്രേറ്റ്, ജില്ലാ ജഡ്ജി, അസിസ്റ്റന്റ് പബ്ലിക് പ്രോസിക്യൂട്ടർ എന്നീ തസ്തികകളിലേക്ക് തയ്യാറെടുക്കുന്ന ഉദ്യോഗാർത്ഥികൾക്ക് സ്കോളർഷിപ്പ് നൽകുകയാണ് ഈ പദ്ധതിയുടെ പ്രഥമ ഘട്ടം. യോഗ്യരായ അപേക്ഷകരിൽ നിന്ന് മികച്ച അഭിഭാഷകരുടെയും നിയമ രംഗത്തുള്ളവരുടെയും മേൽ നോട്ടത്തിലുള്ള അക്കാദമിക് ടീം നടത്തപ്പെടുന്ന എൻട്രൻസ് എക്സാം, ഇന്റർവ്യൂ എന്നിവയിലൂടെ തെരഞ്ഞടുക്കുന്ന ഉദ്യോഗാർത്ഥികൾക്ക് തീവ്രപരിശീലനത്തിന് തയ്യാറാവുന്നതിനും അനുബന്ധ ചിലവുകൾക്കുമായിട്ടാണ് സ്കോളർഷിപ്പ് നൽകുക. പ്രിലിമിനറി പാസാകുന്നവർക്ക് മെയിൻ പരീക്ഷ, ഇന്റർവ്യൂ എന്നിവക്ക് തയ്യാറെടുക്കാനുള്ള സാമ്പത്തിക സഹായവും നൽകുന്ന നിലയിലാണ് സ്കോളർഷിപ്പ് സംവിധാനിച്ചിരിക്കുന്നത്. സ്‌കോളേഴ്‌സിനെ തെരഞ്ഞെടുക്കാനുള്ള എൻട്രൻസ് എക്സാം സെപ്റ്റംബർ രണ്ടാം വാരം തീരൂരിൽ വെച്ച് നടക്കുമെന്ന് എസ്‌ഐസി നേതാക്കൾ അറിയിച്ചു.

ആലോചന യോഗത്തിൽ പ്രസിഡണ്ട് സവാദ് ഫൈസി വർക്കല അധ്യക്ഷത വഹിച്ചു. മാഹീൻ വിഴിഞ്ഞം, അബ്‌ദുറഹ്‌മാൻ പൂനൂർ, മുജീബ് കൊളത്തൂർ, സുബൈർ അൻവരി കൊപ്പം, മൊയിദീൻ കുട്ടി പട്ടാമ്പി എന്നിവർ സംസാരിച്ചു. സെക്രട്ടറി മൻസൂർ ഹുദവി സ്വാഗതവും നൂറുദ്ധീൻ തിരൂർ നന്ദിയും പറഞ്ഞു.