ദുബായ്: കറാമയില്‍ 2 മലയാളികള്‍ മരിക്കാനിടയായ ഗ്യാസ് സ്‌ഫോടനം സംബന്ധിച്ച അന്വേഷണം പുരോഗമിക്കുന്നു. ബുധനാഴ്ച പുലര്‍ച്ചെ കറാമയിലെ ഒരു കെട്ടിടത്തിലുണ്ടായ വാതക ചോര്‍ച്ചയെ തുടര്‍ന്നാണ് പൊട്ടിത്തെറിയുണ്ടായത്. ബര്‍ദുബായ് അനാം അല്‍ മദീന ഫ്രൂട്‌സ് ജീവനക്കാരനായ മലപ്പുറം സ്വദേശി യഅ്ഖൂബ് അബ്ദുല്ല (42), തലശ്ശേരി സ്വദേശി നിതിന്‍ ദാസ് (24) എന്നിവരാണ് മരിച്ചത്. അപകടത്തില്‍ നിരവധി പേര്‍ക്ക് പരിക്കേറ്റിരുന്നു.
കറാമയിലെ ഡേ റ്റു ഡേ ഡിപാര്‍ട്‌മെന്റ് സ്റ്റോറിന് സമീപമുള്ള കെട്ടിടത്തില്‍ ബുധനാഴ്ച പുലര്‍ച്ചെ 12.30ഓടെയായിരുന്നു സ്‌ഫോടനം. അപാര്‍ട്ട്‌മെന്റ് കെട്ടിടത്തിലുണ്ടായിരുന്ന 17 പേര്‍ക്കും സമീപ അപാര്‍ട്‌മെന്റിലെ മറ്റ് രണ്ട് പേര്‍ക്കുമാണ് പരിക്കേറ്റിരുന്നത്. ഇതില്‍ രണ്ടു പേരുടെ നില ഗുരുതരമായിരുന്നു.
സന്ദര്‍ശക വിസയില്‍ ജോലി തേടി എത്തിയതായിരുന്നു നിതിന്‍. ഇതില്‍ കണ്ണൂര്‍ സ്വദേശികളായ ഷനില്‍, നഹീല്‍ എന്നിവരെ ഗുരുതര പരിക്കുകളോടെ റാഷിദ് ആശുപത്രിയില്‍ പ്രവേശിപ്പിച്ചു. മറ്റ് രണ്ട് പേരെ റാഷിദ് ആശുപത്രിയിലും നാല് പേര്‍ എന്‍എംസി ആശുപത്രിയിലും ചികിത്സയിലാണ്