ഫറോക്ക്: ആട്ടിന്‍കുട്ടിയെ തെരുവുനായ്ക്കള്‍ കടിച്ചുകൊന്നു. ബേപ്പൂര്‍-കുണ്ടായിത്തോട് അതിര്‍ത്തിയില്‍ ആമാംകുനിവയല്‍ പാട്ടത്തില്‍ പ്രേമയുടെ വീട്ടിലെ ആട്ടിന്‍കുട്ടിയെയാണു തെരുവുനായ്ക്കള്‍ കൂട്ടത്തോടെയെത്തി കടിച്ചുകൊന്നത്. ഇന്നലെ ഉച്ചയ്ക്കാണു സംഭവം.
വീടിനു സമീപത്തു കെട്ടിയിട്ടിരുന്ന തള്ളയാടിനൊപ്പമുണ്ടായിരുന്ന മൂന്നു കുട്ടികളില്‍ ഒന്നിനെയാണ് കൊന്നത്. ബഹളം കേട്ട് ആളുകള്‍ ഓടിക്കൂടിയതോടെ നായ്ക്കള്‍ ആട്ടിന്‍കുട്ടിയെ ഉപേക്ഷിച്ച് ഓടുകയായിരുന്നു. പ്രദേശത്ത് ഏറെനാളായി തെരുവുനായ ശല്യം രൂക്ഷമാണ്.
രണ്ടാഴ്ച മുന്‍പ് പ്രേമയുടെ വീട്ടിലെ തന്നെ മറ്റൊരാടിനെയും തെരുവുനായ്ക്കള്‍ കടിച്ചുകൊന്നിരുന്നു. കോര്‍പറേഷന്‍ പദ്ധതിയില്‍ നിന്നു ലഭിച്ചതാണ് ആടുകള്‍. തെരുവുനായ ശല്യത്തിനെതിരേ പ്രദേശത്തു പ്രതിഷേധം ശക്തമാണ്.