ദോഹ: ലോകകപ്പിൽ കരുത്തരായ നെതർലാൻഡ്‌സ് ഇന്നിറങ്ങുന്നു. ആഫ്രിക്കൻ പടക്കുതിരകളായ സെനഗലാണ് എതിരാളി. ബയേൺ മൂണികിന്റെ സൂപ്പർ താരം സാദിയോ മാനേ പരിക്ക് മൂലം പിൻമാറിയെങ്കിലും അവഗണിക്കാവുന്ന ടീമല്ല സെനഗൽ. 2002ൽ നിലവിലെ ചാംപ്യൻമാരായ ഫ്രാൻസിനെ ആദ്യ മത്സരത്തിൽ തന്നെ പരാജയപ്പെടുത്തി ലോകത്തെ ഞെട്ടിച്ചാണ് ഫുട്‌ബോൾ ഭൂപ്പടത്തിൽ സെനഗൽ അടയാളപ്പെടുത്തുന്നത്.

ടോട്ടൽ ഫുട്‌ബോൾ എന്ന ശൈലി ലോകത്തിന് പഠിപ്പിച്ച യൊഹാൻ അരീനാ ക്രൈഫിന്റെ നാട്ടുകാർ ലോക ഫുട്‌ബോളിൽ എന്നും മുൻനിരയിലുണ്ടെങ്കിലും ഇതുവരെ കിരീടം ഉയർത്താനായിട്ടില്ല. ഓരോ ജനറേഷനിലും എടുത്തുകാണിക്കാവുന്ന ഫുട്‌ബോൾ ഐക്കണുകളെ സംഭാവന ചെയ്യുന്നവരാണ് ഓറഞ്ചുപട.

ഓറഞ്ചുപടയുടെ മുന്നേറ്റവും പ്രതിരോധവും ഒരുപോലെ കരുത്താർന്നതാണ്. വിർജിൽ വാൻഡികിന്റെ നേതൃത്വത്തിലുള്ള പ്രതിരോധം ലോകോത്തരമാണ്. കൂട്ടിന് ഡാലി ബ്ലിൻഡും ഡിവ്രിജും ഡംഫ്രിസും പോലുള്ളവരും ഉണ്ട്. മധ്യനിരിൽ ഫ്രങ്ക് ഡിജോങും ക്ലാസനും ചില്ലറക്കാരല്ല. മെംഫിസ് ഡീപേയാണ് ആക്രമണത്തിന് ചുക്കാൻ പിടിച്ചത്. ആര്യൻ റോബനെന്ന പടക്കുതിരക്ക് പകരം ആളെത്തിയിട്ടില്ല എന്നതാണ് ലൂയി വാൻഗലെന്ന തന്ത്രജ്ഞനായ പരിശീലകനെ അലട്ടുന്ന പ്രധാന പ്രശ്‌നം.

മൂന്നുതവണ ഫൈനൽ കളിച്ചിട്ടും കിരീടം കൈവിട്ടു പോയ ചരിത്രം തിരുത്തുക എന്ന വെല്ലുവിളിയാണ് ഇക്കുറി ഓറഞ്ച് പടയ്ക്ക് മുന്നിലുള്ളത്.

ആഫ്രിക്കൻ വൻകരയിൽനിന്ന് ഒന്നാമതായാണ് സെനഗലിന്റെ വരവ്. മുഹമ്മദ് സലാഹിന്റെ ഈജിപ്തിനെ പരാജയപ്പെടുത്തി ആഫ്രിക്കൻ നേഷൻസ് കപ്പും സ്വന്തമാക്കി. മാനേ ഇല്ലെങ്കിലും കാലിഡോ കൗലിബാലി, ഇദ്രിസ ഗുയെ, ഇസ്മഇലസാർ, അബ്ദോ ഡയാലോ എന്നിവരെല്ലാം അപകടം വിതയ്ക്കുന്നവരാണ്.

ലോക റാങ്കിങ്ങിൽ എട്ടാം സ്ഥാനത്താണ് ഹോളണ്ട്. സെനഗലാവട്ടെ 18 ാം സ്ഥാനത്തും.

Senegal vs Netherlands update