ന്യൂഡല്‍ഹി: അസ്സലാമു അലൈകുമെന്ന് അഭിവാദ്യം ചെയ്യുന്നത് നിയമവിരുദ്ധമാണെന്ന് കോടതി പറഞ്ഞാല്‍ അത് നിര്‍ത്തിക്കോളാമെന്ന് സി.എ.എ വിരുദ്ധ സമരം നടത്തിയതിന് ഡല്‍ഹി കലാപക്കേസില്‍ പ്രതിചേര്‍ക്കപ്പെട്ട ഖാലിദ് സെയ്ഫി ഡല്‍ഹി കോടതിയില്‍. കേസിലെ വാദത്തിനിടെയാണ് സെയ്ഫിയുടെ അഭിഭാഷകന്‍ അഡീഷണല്‍ സെഷന്‍സ് ജഡ്ജി അമിതാബ് റാവത്ത് മുന്‍പാകെ ഇക്കാര്യം പറഞ്ഞത്. 

 

ഇതേ കേസിലെ മറ്റൊരു പ്രതി ഷര്‍ജീല്‍ ഇമാം പ്രസംഗങ്ങളുടെ തുടക്കത്തില്‍ അസ്സലാമു അലൈകുമെന്ന് അഭിവാദ്യം ചെയ്യുന്നുവെന്ന് ഡല്‍ഹി പൊലിസ് കോടതിയില്‍ ആരോപിച്ചിരുന്നു.

അസ്സലാമു അലൈകുമെന്ന് ഒരു പ്രസംഗത്തിന്റെ തുടക്കത്തില്‍ പറയുന്നത് തെറ്റാണെന്ന് ഡല്‍ഹി പൊലിസ് പറഞ്ഞത് വായിച്ചു. അങ്ങനെ പറയരുതെന്ന് നിയമമുണ്ടോ ? 

ഞാന്‍ എപ്പോഴും എന്റെ സുഹൃത്തുക്കളെ സലാം ചൊല്ലി അഭിവാദ്യം ചെയ്യാറുണ്ട്. ഇത് നിയമവിരുദ്ധമാണെങ്കില്‍ അത് നിര്‍ത്തേണ്ടിവരുമെന്നാണ് കരുതുന്നതെന്നും സെയ്ഫി പറഞ്ഞു. 

താന്‍ പുറത്തിറങ്ങിയാലുടന്‍ ഡല്‍ഹി പൊലിസിനെതിരേ ദേശീയ ഹരിത ട്രൈബ്യൂണലില്‍ പരാതി കൊടുക്കാന്‍ പോകുകയാണെന്നും രണ്ടു ദശലക്ഷം പേജുകള്‍ വരുന്ന കുറ്റപത്രം തയാറാക്കി അത്രയും പരിസ്ഥിതി നാശമാണ് പൊലിസുണ്ടാക്കിയതെന്നും സെയ്ഫി പരിഹസിച്ചു.