ശ്രീനഗര്‍: രണ്ടു ദിവസത്തെ സന്ദര്‍ശനത്തിനായി ജമ്മുവിലെത്തിയ രാഹുല്‍ഗാന്ധി വിവിധ നേതാക്കളുമായി ചര്‍ച്ച നടത്തി. കഴിഞ്ഞ ദിവസം ജമ്മുവിലെത്തിയ അദ്ദേഹം ബി.ജെ.പിക്കും ആര്‍.എസ്.എസിനും കേന്ദ്രസര്‍ക്കാരിനുമെതിരേ രൂക്ഷ വിമര്‍ശനങ്ങളാണ് ഉന്നയിച്ചത്.

ആര്‍.എസ്.എസും ബി.ജെ.പിയും കശ്മിരിന്റെ സംസ്‌കാരവും ഐക്യവും തകര്‍ക്കാനാണ് ശ്രമിക്കുന്നതെന്നും ഇക്കാര്യത്തില്‍ ജാഗ്രത വേണമെന്നും ജമ്മുവില്‍ പാര്‍ട്ടി പരിപാടിയില്‍ സംസാരിക്കവേ അദ്ദേഹം പറഞ്ഞു. ജനങ്ങളുടെ മനസില്‍ ഭീതി വിതയ്ക്കുകയാണ് കേന്ദ്രസര്‍ക്കാര്‍ ചെയ്യുന്നത്. കശ്മിര്‍ സ്വന്തം വീടുപോലെയാണ് തനിക്ക് അനുഭവപ്പെടുന്നത്. താനൊരു കശ്മിരി പണ്ഡിറ്റാണെന്നും അദ്ദേഹം പറഞ്ഞു. രാഹുലിന്റെ സന്ദര്‍ശനം പ്രമാണിച്ച് ജമ്മുവില്‍ നടന്ന സമ്മേളനത്തില്‍ കോണ്‍ഗ്രസിന്റെ മുതിര്‍ന്ന നേതാവ് ഗുലാം നബി ആസാദ് അടക്കമുള്ളവര്‍ പങ്കെടുത്തു. 

കഴിഞ്ഞ ദിവസം അദ്ദേഹം ജമ്മുവിലെ മാതാ വൈഷ്‌ണോ ദേവി ക്ഷേത്രത്തില്‍ സന്ദര്‍ശനം നടത്തിയിരുന്നു. കത്രയില്‍നിന്ന് കാല്‍നടയായി ക്ഷേത്രത്തിലെത്തിയ അദ്ദേഹം, അവിടെവച്ച് രാഷ്ട്രീയ അഭിപ്രായങ്ങള്‍ പങ്കുവയ്ക്കാന്‍ വിസമ്മതിക്കുകയും ചെയ്തിരുന്നു. ഇവിടെ നടന്ന ചടങ്ങില്‍ ജയ് മാതാ ദി എന്ന് സദസിനോട് ഉച്ചരിക്കാന്‍ നിര്‍ദേശിക്കുകയും ചെയ്തു.