മുംബൈ: 91 റണ്‍സിന് ഏഴ് വിക്കറ്റ് എന്ന ദയനീയമായ അവസ്ഥയില്‍ നിന്നും അവിശ്വസനീയമായ തിരിച്ചുവരവോടെ അഫ്ഗാനെ തറപറ്റിച്ച് ലോകകപ്പ് ക്രിക്കറ്റ് സെമിഫൈനല്‍ സ്ഥാനം ഉറപ്പാക്കി ഓസ്‌ട്രേലിയ.അഫ്ഗാനിസ്താന്‍ ഉയര്‍ത്തിയ 292 റണ്‍സ് വിജയലക്ഷ്യം ഓസീസ് 46.5 ഓവറില്‍ ഏഴ് വിക്കറ്റ് നഷ്ടത്തില്‍ മറികടന്നു. മത്സരം കൈവിട്ട ഓസീസിനെ ഒറ്റയ്ക്ക് ചുമലിലേറ്റി അസാമാന്യമായ പ്രകടനത്തിലൂടെ വിജയത്തിലേക്ക് നയിച്ചിരിക്കുകയാണ് ഗ്ലെന്‍ മാക്‌സ്‌വെല്‍ എന്ന റണ്‍ മെഷീന്‍. ഇരട്ട സെഞ്ചുറി നേടിയാണ് താരം ടീമിന് ഉജ്ജ്വല വിജയം സമ്മാനിച്ചത്.

കൂട്ടിന് ഒരു സ്‌പെഷ്യലിസ്റ്റ് ബാറ്റര്‍ പോലുമില്ലാതിരുന്നിട്ടും മാക്‌സ്‌വെല്‍ ഒറ്റയ്ക്ക് നിന്ന് പൊരുതി അത്ഭുതകരമായി ടീമിന് വിജയം സമ്മാനിച്ചു.
മാക്‌സ്‌വെല്‍ 128 പന്തുകളില്‍ നിന്ന് 21 ഫോറിന്റെയും 10. സിക്‌സിന്റെയും സഹായത്തോടെ 201 റണ്‍സാണ് അടിച്ചെടുത്തത്. ഈ ലോകകപ്പിലെ ഒരു താരത്തിന്റെ ഏറ്റവും ഉയര്‍ന്ന സ്‌കോറാണിത്. അതുപോലെ ലോകകപ്പില്‍ ചേസിങ്ങില്‍ ഒരു താരം നേടുന്ന ഏറ്റവും ഉയര്‍ന്ന സ്‌കോറുമാണിത്.
അഫ്ഗാനിസ്താന്‍ ഉയര്‍ത്തിയ 292 റണ്‍സ് വിജയലക്ഷ്യത്തിലേക്ക് ബാറ്റിങ് ആരംഭിച്ച ഓസ്‌ട്രേലിയയെ അഫ്ഗാന്‍ വിറപ്പിച്ചു. പേരുകേട്ട ഓസീസ് ബാറ്റിങ് നിര അഫ്ഗാന്‍ ബൗളര്‍മാര്‍ക്ക് മുന്നില്‍ മുട്ടുകുത്തി വീണു. പാറ്റ് കമ്മിന്‍സിനെ കൂട്ടുപിടിച്ച് മുന്നേറിയ മാക്‌സ് വെല്ലിനെ പുറത്താക്കാനുള്ള അവസരം രണ്ട് തവണ കൈവിട്ടതാണ് അഫ്ഗാന് തിരിച്ചടിയായത്.

Content Highlights:aus won against afganisthan maxwell got 200