നരവേട്ടയുടെ 39ാം നാള്‍; അല്‍ശിഫ ആശുപത്രിക്കുള്ളില്‍ ഇസ്‌റാഈല്‍ സൈന്യത്തിന്റെ കടന്നാക്രമണം

ഗസ്സ: അപലപനങ്ങള്‍ക്കും വിമര്‍ശനങ്ങള്‍ക്കുമപ്പുറം പ്രതികരണമേതുമില്ലാത്ത ലോകത്തിന്റെ മുഴുവന്‍ മൗനാനുവാദത്തോടെ ഇസ്‌റാഈല്‍ സൈന്യം ഫലസ്തീനില്‍ തങ്ങളുടെ സംഹാര താണ്ഡവം അതിരൂക്ഷമായി തുടരുന്നു. ഗസ്സയിലെ അല്‍ശിഫ ആശുപത്രിക്കുള്ളില്‍ പ്രവേശിപ്പിച്ചിരിക്കുകയാണ് ഇസ്‌റാഈല്‍ സൈന്യം. ഹമാസ് പോരാളികളെ അക്രമിക്കാനെന്നും ബന്ദികളെ ആശുപത്രിക്കുള്ളിലാണ് ഒളിപ്പിച്ചിരിക്കുന്നതെന്നും പറഞ്ഞാണ് ഈ കടന്നാക്രമണം.

എന്നാൽ ആശുപത്രിക്കുള്ളിൽ നൂറുകണക്കിന് രോഗികളും അഭയാർഥികളായെത്തിയ ആയിരക്കണക്കിന് സിവിലിയൻമാരുമല്ലാതെ മറ്റാരുമില്ലെന്ന് ആരോഗ്യമന്ത്രാലയ വക്താൾ വ്യക്തമാക്കുന്നു. നിരന്തരമായി അൽശിഫ ആശുപത്രിയിൽ നിന്ന് വെടിവെപ്പുണ്ടാകുന്നതായി ഗസ്സ ആരോഗ്യമന്ത്രാലയം അറിയിച്ചു. 650 രോഗികളും 5000ത്തിനും 7000ത്തിനു ഇടക്ക് സിവിലിയൻമാരും അൽശിഫ ആശുപത്രിയിൽ തുടരുന്നുവെന്നാണ് റിപ്പോർട്ട്. 1000ത്തോളം ആരോഗ്യപ്രവർത്തകരും ആശുപത്രിയിൽ കുടുങ്ങി കിടക്കുന്നുണ്ട്. ആശുപത്രി വളപ്പിൽ സൈനിക ടാങ്കുകളും ബുൾഡോസറുകളും നിരത്തി വിന്യസിച്ചിരിക്കുകയാണ്.

അതേസമയം, ഇസ്‌റാഈൽ ആക്രമണത്തിന്റെ പശ്ചാത്തലത്തിൽ രോഗികളെ തെരുവുകളിലേക്ക് ഇറക്കി വിടില്ലെന്ന് അൽശിഫ ആശുപത്രി അഡ്മിനിസ്‌ട്രേഷൻ അറിയിച്ചു. സുരക്ഷിതമായ മാനുഷിക ഇടനാഴിയിലൂടെ രോഗികളുടെ ആരോഗ്യം പരിഗണിച്ച് മാത്രമേ ഒഴിപ്പിക്കൽ നടത്തുവെന്ന് അൽശിഫ ആശുപത്രി ഡയറക്ടർ അറിയിച്ചതായി ഗസ്സ ആരോഗ്യമന്ത്രാലയം വ്യക്തമാക്കി. അൽശിഫ ആശുപത്രിയിലുള്ളവരുടെ ജീവൻ രക്ഷിക്കാനായി ഇടപെടണമെന്ന് ആരോഗ്യമന്ത്രാലയ വക്താവ് അശറഫ് അൽ ഖുദ്‌റ ഖത്തറിനോടും ഈജിപ്തിനോടും ആവശ്യപ്പെട്ടു.

ബോംബിട്ടും വെടിവെച്ചും ഒപ്പം വൈദ്യുതി മുടക്കിയും ഉപരോധം തീർത്തും ഗസ്സയിലെ അൽ ശിഫ ആശുപത്രിയിൽ ഇസ്‌റാഈൽ കൊന്നൊടുക്കിയ 179 ഫലസ്തീനികളെ ആശുപത്രിവളപ്പിൽതന്നെ കൂട്ടക്കുഴിമാടമൊരുക്കി ഖബറടക്കി. ഇന്ധനം തീർന്ന് ഇരുട്ടിലായ ആശുപത്രിയിൽ ഇൻകുബേറ്ററിൽ കഴിഞ്ഞിരുന്ന ഏഴ് നവജാത ശിശുക്കളും അത്യാഹിത വിഭാഗത്തിലെ 29 രോഗികളും കഴിഞ്ഞദിവസം മരണത്തിന് കീഴടങ്ങിയിരുന്നു.

ബോംബിങ്ങിലും വെടിവെപ്പിലും കൊല്ലപ്പെട്ടവരുടേതടക്കമുള്ള മൃതദേഹങ്ങൾ സംസ്‌കരിക്കാനാകാതെ ആശുപത്രി വളപ്പിൽ അഴുകിയ നിലയിലായിരുന്നു. ഇവ പുറത്തേക്കു മാറ്റാൻ അനുമതി നിഷേധിച്ചതിനെ തുടർന്നാണ് ആശുപത്രി വളപ്പിൽ തന്നെ ഖബറിടമൊരുക്കിയതെന്ന് അൽ ശിഫ ഡയറക്ടർ മുഹമ്മദ് അബൂ സാൽമിയ പറഞ്ഞു. കനത്ത മഴക്കിടെ ആശുപത്രി മുറ്റത്തുതന്നെ മയ്യിത്ത് നമസ്‌കാരം നിർവഹിച്ചാണ് ഖബറടക്കം നടത്തിയത്.

'അതിനിടെ സ്ത്രീകളേയും കുട്ടികളേയും കൊല്ലുന്നത് ഇസ്‌റാഈൽ അവസാനിപ്പിക്കണമെന്നാവശ്യപ്പെട്ട് കാനഡ രംഗത്തെത്തി.
പരമാവധി സംയമനം പാലിക്കണമെന്ന് ഞാൻ ഇസ്‌റാഈൽ സർക്കാരിനോട് അഭ്യർത്ഥിക്കുന്നു. ടെലിവിഷനിലൂടെയും സോഷ്യൽമീഡിയയിലൂടെയും ലോകം ഇതെല്ലാം കാണുന്നുണ്ട്. ഡോക്ടർമാരുടെയും കുടുംബാംഗങ്ങളുടെയും രക്ഷപ്പെട്ടവരുടെയും മാതാപിതാക്കളെ നഷ്ടപ്പെട്ട കുട്ടികളുടെയും സാക്ഷ്യങ്ങൾ ഞങ്ങൾ കേൾക്കുന്നു' ട്രൂഡോയുടെ വാക്കുകളെ ഉദ്ധരിച്ച് റോയിട്ടേഴ്‌സ് റിപ്പോർട്ട് ചെയ്യുന്നു.