തൊടുപുഴ: മോഷ്ടിച്ച ബൈക്കുമായി കുട്ടിക്കള്ളന്‍ പിടിയില്‍. വെള്ളിയാഴ്ച രാത്രിയില്‍ തൊടുപുഴ ഷാഡോ പൊലിസ് നടത്തിയ പരിശോധനയിലാണ് പ്ലസ് വണ്‍ വിദ്യാര്‍ഥിയായ കുട്ടികള്ളന്‍ വലയിലായത്. ബൈക്കില്‍ നിന്നും പെട്രോള്‍ ഊറ്റിയെടുക്കുന്നതിനിടയൊണ് പ്രായപൂര്‍ത്തിയാകാത്ത കുട്ടിമോഷ്ടാവിനെ പിടികൂടിയത്. കഴിഞ്ഞ ദിവസങ്ങളില്‍ കരിങ്കുന്നം സുബ്രമണ്യക്ഷേത്രത്തിലെ ഭണ്ഡാരക്കുറ്റിയും ചുങ്കം പള്ളിയിലെ നേര്‍ച്ചപ്പെട്ടിയും കുത്തിത്തുറന്ന് പണം കവര്‍ന്നതായും കുട്ടിമോഷ്ടാവ് പൊലിസിനോട് പറഞ്ഞു. സഞ്ചരിച്ചിരുന്ന ബൈക്ക് രാമപുരത്ത് നിന്നും മോഷ്ടിച്ചതാണെന്ന് പോലിസ് സ്ഥിരികരിച്ചു.
വിവിധ സ്‌റ്റേഷനുകളിലായി നിരവധി കേസുകളില്‍ പ്രതിയായ കുട്ടിമോഷ്ടാവ് പൊലിലിസിനെ വട്ടംകറക്കിയതിനുശേഷമാണ് കുറ്റം സമ്മതിച്ചത്. തൊണ്ടിമുതലുമായാണ് കുട്ടിക്കള്ളന്‍ കുടുങ്ങിയത്. കുട്ടിമോഷ്ടാവ് അന്വേഷണം വഴി തെറ്റിക്കാന്‍ ശ്രമിച്ചെങ്കിലും അവസാനം മോഷണക്കുറ്റം സമ്മതിച്ചു. പാലയില്‍ നിന്നും വണ്ണപ്പുറത്തുള്ള സുഹൃത്തിന്റെ അടുക്കല്‍ വന്നതാണെന്നും ബൈക്കിലെ പെട്രോള്‍ തീര്‍ന്നുപോയതുകൊണ്ട് പെട്രോള്‍ വാങ്ങാന്‍ നല്‍കിയ ചില്ലറയാണ് പോക്കറ്റിലുള്ളതെന്നും, പമ്പില്ലാത്തകൊണ്ടാണ് ബൈക്കില്‍ നിന്നും പെട്രോള്‍ ഊറ്റാന്‍ ശ്രമിച്ചതെന്നുമാണ് കുട്ടിമോഷ്ടാവ് ആദ്യം പൊലിസിനോട് പറഞ്ഞത്. പിന്നീട് പൊലിസ് നടത്തിയ അന്വേഷണത്തിലാണ് മോഷ്ടാവിനെക്കുറിച്ചുള്ള വിവരം പുറത്തുവന്നത്. കരിങ്കുന്നം പൊലിസ് പ്രതിയെ ഇന്നലെ ജുവനൈല്‍ ജസ്റ്റിസ് ബോര്‍ഡിനു മുന്നില്‍ ഹാജരാക്കി.