വിഴിഞ്ഞം: മത്സ്യബന്ധനം കഴിഞ്ഞ് കരയിലേക്ക് മടങ്ങുന്നതിനിടെ തിരയില്‍പെട്ട് വള്ളം മറിയുമെന്നായപ്പോള്‍ വെള്ളത്തില്‍ ചാടി നീന്തി രക്ഷപ്പെടാന്‍ ശ്രമിച്ച അഞ്ചംഗസംഘത്തിലെ ഒരാള്‍ മരിച്ചു. പൊഴിയൂര്‍ പരുത്തിയൂര്‍ പുതുവല്‍ പുരയിടത്തില്‍ മൈക്കില്‍ കുഞ്ഞ് (65) ആണ് മരിച്ചത്. ഇന്നലെ രാവിലെ പൊഴിയൂരിലായിരുന്നു അപകടം. മത്സ്യബന്ധനം കഴിഞ്ഞ് പൊഴിയൂരില്‍ കരയില്‍ വള്ളം അടുപ്പിക്കുന്നതിനിടെ ശക്തമായ തിരയില്‍പ്പെട്ട് വള്ളം മറിയുമെന്നായപ്പോള്‍ അഞ്ചുപേരും വെള്ളത്തിലേക്ക് ചാടുകയായിരുന്നു. ഇതിനിടയില്‍ കൈകാലുകള്‍ കുഴഞ്ഞ് മൈക്കില്‍ കുഞ്ഞ് വെള്ളത്തില്‍ മുങ്ങിപ്പോയി. തുടര്‍ന്ന് കൂടെയുണ്ടായിരുന്നവര്‍ രക്ഷപ്പെടുത്തി തിരികെ വളളത്തില്‍ കയറ്റി വിഴിഞ്ഞം തീരത്തെത്തിച്ചു. അവിടെ നിന്ന് ആംബുലന്‍സില്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചെങ്കിലും മരിച്ചു. വെള്ളിയാഴ്ച രാത്രിയോടെയാണ് സംഘം മത്സ്യബന്ധനത്തിനായി പോയത്. ശക്തമായ തിര കാരണം പൊഴിയൂരില്‍ വള്ളം അടുപ്പിക്കാന്‍ കഴിയാതിരുന്നതിനെ തുടര്‍ന്നാണ് മൈക്കിലിനെയും കൊണ്ട് സംഘം വിഴിഞ്ഞം തീരത്ത് എത്തിയതെന്ന് തീരദേശ പൊലിസ് പറഞ്ഞു. മൃതദേഹം പോസ്റ്റുമാര്‍ട്ടത്തിന് ശേഷംബന്ധുക്കള്‍ക്ക് വിട്ടുകൊടുത്തു.