ദേശമംഗലം(സമർഖന്ദ്): ദേശമംഗലം സമർഖന്ദ് നഗരിയിൽ ഇന്നു മുതൽ എസ്.കെ.എസ്.എസ്.എഫ് സർഗലയത്തിന്റെ സർഗാത്മക പോരാട്ടങ്ങൾക്ക് തുടക്കമാവും. കഴിഞ്ഞ ദിവസം 14 പതാകകൾ വിണ്ണിലേക്കുയർന്നതോടെയാണ് 14-ാംമത് സർഗലയത്തിനു നാന്ദികുറിച്ചു. മജ്ലിസുന്നൂറിന്റെ മനോഹര ശീലുകളിൽ കുതിർന്ന ആത്മീയ സംഗമത്തിനും കഴിഞ്ഞദിവസം സമർഖന്ദ് വേദിയായി. അതിനു ശേഷമാണ് ഇന്നലെ ഉദ്ഘാടന സമ്മേളനം നടന്നത്. ലോകത്തെ ഏറ്റവും വലിയ ഖുർആൻ കൈയെഴുത്ത് കലിഗ്രഫിയുടെ പ്രദർശനവും കാഴ്ച്ചകളുടെ വിസ്മയമൊരുക്കുന്ന എക്സിബിഷനും സമർഖന്ദിനെ മനോഹരമാക്കിയിട്ടുണ്ട്.

ഇന്നലെ മുതൽ മുതൽ വിവിധ ജില്ലകളിൽ നിന്നുള്ള കലാപ്രതിഭകൾ നഗരിയിലെത്തിത്തുടങ്ങി. ഇന്നു രാവിലെ ഒമ്പതു മുതൽ ഏഴു വേദികളിലായി മത്സരങ്ങൾക്കു തുടക്കം കുറിക്കും. ത്വലബ വിഭാഗത്തിൽ ജൂനിയർ,സീനിയർ, ഗ്രൂപ്പ് എന്നിങ്ങനെയും ജനറൽ വിഭാഗത്തിൽ സബ് ജൂനിയർ, ജൂനിയർ, സീനിയർ,സൂപ്പർ സീനിയർ വിഭാഗങ്ങളിലായും 1500ലേറെ പ്രതിഭകൾ രണ്ടുദിവസങ്ങളിലായി മാറ്റുരക്കും. മാപ്പിളപ്പാട്ട്, ബുർദാലാപനം, വിവിധ ഭാഷാ പ്രസംഗങ്ങൾ, ദഫ് മുട്ട് തുടങ്ങി വിവിധങ്ങളായ മത്സരങ്ങൾ കൊണ്ട് സമർഖന്ദ് പുളകമണിയും. ഏഴുവേദികളിലായി 65 ഇനം മത്സരങ്ങളാണ് നടക്കുക. വിവിധ ജില്ലകളെ പ്രതിനിധീകരിച്ചെത്തുന്ന പ്രതിഭകൾക്ക് ഭക്ഷണം താമസം തുടങ്ങിയവക്കായി വിപുലമായ സൗകര്യങ്ങളാണ് നഗരിയിൽ ഒരുക്കിയിട്ടുള്ളത്. സന്നദ്ധ പ്രവർത്തനങ്ങൾക്കായി 170ലേറെ വിഖായ പ്രവർത്തകരും കർമരംഗത്തുണ്ട്.

എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങൾ ആണ് ഉദ്ഘാടനംചെയ്തത്. ഇസ് ലാം കലക്കും സാഹിത്യത്തിനും അത്യുന്നത സ്ഥാനമാണ് നൽകിയതെന്നും അതു ഇസ് ലാമിക പ്രബോധന രംഗത്ത് ഉപയോഗപ്പെടുത്താൻ സാധിക്കണമെന്നും അദ്ദേഹം പറഞ്ഞു. ഇസ് ലാം ഏറെ തെറ്റിദ്ധരിപ്പിക്കപ്പെടുന്നകാലത്ത് മികവുറ്റ പ്രഭാഷകരും എഴുത്തുകാരും ഉയർന്നുവരേണ്ടത് ആവശ്യമാണ്. അതിനു ഇത്തരം സർഗാത്മക പോരാട്ടങ്ങൾ അവസരമൊരുക്കും. വിശുദ്ധ ഖുർആനും പ്രവാചക ജീവിതവും ഇത്തരം നന്മനിറഞ്ഞ പ്രവർത്തനങ്ങളെ പ്രോത്സാഹിപ്പിച്ചതായി കാണാനാവുമെന്നും അതിനെ ഉൾക്കൊള്ളാൻ വിശ്വാസികൾക്കു കഴിയണമെന്നും ഹമീദലി തങ്ങൾ പറഞ്ഞു.