ദുബൈ: അഞ്ചുവര്‍ഷത്തിനിടെ എത്ര തവണ വേണമെങ്കിലും രാജ്യം സന്ദര്‍ശിക്കാവുന്ന മള്‍ട്ടിപിള്‍ എന്‍ട്രി ടൂറിസ്റ്റ് വിസയുമായി യു.എ.ഇ എമിഗ്രേഷന്‍ വിഭാഗം. 650 ദിര്‍ഹമേ (13,157 രൂപ) ഇതിനായി നല്‍കേണ്ടതുള്ളൂ. ഇതിനുള്ള അപേക്ഷാ നടപടികള്‍ ആരംഭിച്ചതായി ഖലീജ് ടൈംസ് റിപ്പോര്‍ട്ട് ചെയ്തു. എല്ലാ രാജ്യക്കാര്‍ക്കും വിസ ലഭിക്കും.

ഈ വിസയിലെത്തുന്നവര്‍ക്ക് സ്വന്തം സ്‌പോണ്‍സര്‍ഷിപ്പില്‍ എത്ര തവണയും വരാം. ഓരോ തവണയും 90 ദിവസം വരെ യു.എ.ഇയില്‍ തങ്ങാം. ഐ.സി.എ വഴിയോ എമിഗ്രേഷന്‍ വകുപ്പ് വഴിയോ അപേക്ഷിക്കാം.

യു.എ.ഇ ഫെഡറല്‍ അതോറിറ്റി ഫോര്‍ ഐഡന്റിറ്റി ആന്‍ഡ് സിറ്റിസന്‍ഷിപ്പ് (ഐസിഎ) വഴി 650 ദിര്‍ഹമാണ് (13131 രൂപ) അഞ്ചുവര്‍ഷത്തെ മള്‍ട്ടിപ്പിള്‍ എന്‍ട്രി വിസക്കായി അപേക്ഷന്‍ നല്‍കേണ്ടത്. ഐ.സി.എ വെബ്‌സൈറ്റ് വഴി താത്പര്യമുള്ളവര്‍ക്ക് നേരിട്ട് വിസക്കായി അപേക്ഷിക്കാന്‍ സാധിക്കും. അപേക്ഷകന്റെ ബാങ്ക് സ്റ്റേറ്റ്‌മെന്റുകള്‍ ഉള്‍പ്പെടെയുള്ള രേഖകള്‍ വെബ്‌സൈറ്റില്‍ നേരിട്ട് അപ്ലോഡ് ചെയ്യാന്‍ കഴിയുമെന്ന് ഖലീജ് ടൈംസ് റിപ്പോര്‍ട്ട് ചെയ്യുന്നു. അതേ സമയം, അപേക്ഷകന് വിസ നല്‍കണോ വേണ്ടയോ എന്നത് ഇമിഗ്രേഷന്‍ അതോറിറ്റിയുടെ വിവേചനാധികാരമാണ്.