കറാച്ചി: ഇറാന്‍ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെട്ടതിന് പിന്നാലെ വിവിധ ഇടങ്ങളില്‍ പ്രതിഷേധം. ബാഗ്ദാദിലും പാകിസ്താനിലും യു.എസ് എംബസിക്ക് നേരെ പ്രതിഷേധമുണ്ടായി. 

കറാച്ചിയിലെ യു.എസ് എംബസി പ്രതിഷേധക്കാര്‍ അടിച്ചുതകര്‍ക്കുകയും തീയിടുകയും ചെയ്തു. സുരക്ഷാ സേനയുമായുണ്ടായ സംഘര്‍ഷത്തില്‍ ആറ് പേര്‍ കൊല്ലപ്പെട്ടെന്നാണ് റിപ്പോര്‍ട്ട്. പ്രതിഷേധക്കാരെ പിരിച്ചുവിടാന്‍ സുരക്ഷാ ഉദ്യോഗസ്ഥര്‍ കണ്ണീര്‍വാതകവും ലാത്തിച്ചാര്‍ജും പ്രയോഗിച്ചു. ഇതിനിടയില്‍ നടന്ന വെടിവെപ്പിലാണ് ആറ് പേര്‍ കൊല്ലപ്പെട്ടതെന്നാണ് റിപ്പോര്‍ട്ടില്‍ പറയുന്നത്.  ആറ് മൃതദേഹങ്ങള്‍ കറാച്ചിയിലെ സിവില്‍ ഹോസ്പിറ്റലില്‍ എത്തിച്ചതായി പൊലിസ് സര്‍ജന്‍ ഡോ. സുമ്മയ്യ സയ്യിദ് പറഞ്ഞതായാണ് ഡോണിന്റെ റിപ്പോര്‍ട്ട്. 30ലേറെ പേര്‍ക്ക് പരിക്കേറ്റതായും റിപ്പോര്‍ട്ടില്‍ പറയുന്നു. മരണസംഖ്യ കൂടിയേക്കാമെന്നാണ് സൂചന.

കോണ്‍സുലേറ്റിന് പുറത്ത് പ്രതിഷേധക്കാര്‍ തടിച്ചുകൂടുകയും പിന്നീട് സുരക്ഷാ വേലികള്‍ ഭേദിച്ച് വളപ്പിനുള്ളിലേക്ക് കടക്കുകയുമായിരുന്നു. വടിയും കല്ലും ഉപയോഗിച്ചാണ് കോണ്‍സുലേറ്റ് തകര്‍ത്തത്. ഇതിന്റെ ദൃശ്യങ്ങള്‍ പുറത്തുവന്നിട്ടുണ്ട്. സുരക്ഷാ ഏജന്‍സികള്‍ പ്രദേശം വളഞ്ഞിരിക്കുകയാണ്.

ALSO READ: ഇസ്രാഈല്‍ ആക്രമണം; ഇറാന്‍ പ്രതിരോധ മന്ത്രി കൊല്ലപ്പെട്ടതായി റിപ്പോര്‍ട്ട് 

അതേസമയം വെടിവെപ്പുണ്ടായ സാഹചര്യത്തെക്കുറിച്ച് ഔദ്യോഗികമായ പ്രസ്താവനകളൊന്നും വന്നിട്ടില്ല. കറാച്ചി അഡീഷണല്‍ ഇന്‍സ്‌പെക്ടര്‍ ജനറല്‍ ഓഫ് പൊലിസിനോട്, സിന്ധ് ആഭ്യന്തര മന്ത്രി സിയാഉല്‍ ഹസന്‍ ലഞ്ചാര്‍ വിവരങ്ങള്‍ തേടിയിട്ടുണ്ട്. സെന്‍സിറ്റീവായ സ്ഥാപനങ്ങളുടെ സുരക്ഷ കൂടുതല്‍ ഫലപ്രദമാക്കാനും അദ്ദേഹം ഉത്തരവിട്ടു.

ഇറാഖിലെ ബസറയിലും കനത്ത പ്രതിഷേധമുണ്ടായി. ബാഗ്ദാദിലും പ്രതിഷേധം ശക്തമായി. ബാഗ്ദാദിലെ യു.എസ് എംബസിക്ക് സമീപം ഗ്രീന് സോണിലാണ് പ്രതിഷധക്കാര്‍ എത്തിയത്. 

അമേരിക്കയും ഇസ്രായേലും സംയുക്തമായി നടത്തിയ വ്യോമാക്രമണത്തിലാണ് ഇറാന്റെ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെടുന്നത്.

widespread protests have erupted in parts of pakistan and iraq following the killing of Ayatollah Ali Khamenei in a reported joint airstrike by the united states and Israel.