തെഹ്‌റാന്‍: കഴിഞ്ഞ ദിവസം നടന്ന ആക്രമണങ്ങളില്‍ സൈനിക മേധാവിയും പ്രതിരോധമന്ത്രിയും  കൊല്ലപ്പെട്ടതായി സ്ഥിരീകരിച്ച് ഇറാന്‍. സൈനികമേധാവി അബ്ദുല്‍ റഹീം മൗസവി, പ്രതിരോധമന്ത്രി അസീസ് നാസിര്‍സാദെ എന്നിവര്‍ കൊല്ലപ്പെട്ടതായി വാര്‍ത്ത ഏജന്‍സിയായ ഇര്‍നയാണ് റിപ്പോര്‍ട്ട് ചെയ്തത്. ഇതിന് പുറമേ ആക്രമണങ്ങളില്‍ മറ്റ് ചില പ്രമുഖരും കൊല്ലപ്പെട്ടിട്ടുണ്ടെന്നും ഇവരുടെ പേരുകള്‍ വൈകാതെ പുറത്തുവിടുമെന്നും ഇറാന്‍ അറിയിക്കുന്നു.

ശനിയാഴ്ച നടത്തിയ ആക്രമണത്തില്‍ ഇറാന്‍ പരമോന്നത നേതാവ് ആയത്തുല്ല അലി ഖാംനഈ കൊല്ലപ്പെട്ടിരുന്നു. ഞായറാഴ്ച രാവിലെയാണ് ഇറാന്‍ മാധ്യമങ്ങള്‍ ഖാംനഈയുടെ രക്തസാക്ഷിത്വം സ്ഥിരീകരിച്ചത്. ഖാംനഈയുടെ മരണം ട്രംപാണ് സമൂഹമാധ്യമത്തിലൂടെ ആദ്യം അറിയിച്ചത്. തുടര്‍ന്ന് താസ്‌നിം ഫാര്‍സ് തുടങ്ങിയ വാര്‍ത്ത ഏജന്‍സികളും മരണം സ്ഥിരീകരിച്ച് രംഗത്തെത്തി. ഖാംനഈയുടെ മകളും മരുമകനും കൊച്ചുമകളും കൊല്ലപ്പെട്ടതായും ഇറാന്‍ വാര്‍ത്ത ഏജന്‍സികള്‍ റിപ്പോര്‍ട്ട് ചെയ്തു.

ഖാംനഈയുടെ മരണത്തില്‍ ഏഴ് ദിവസത്തെ അവധി ഇറാന്‍ സര്‍ക്കാര്‍ രാജ്യത്ത് പ്രഖ്യാപിച്ചിട്ടുണ്ട്. 40 ദിവസത്തെ ഔദ്യോഗിക ദുഃഖാചരണവും നടത്തും. ഖാംനഈയുടെ മരണം സ്ഥിരീകരിച്ചുവെങ്കിലും ഇതുമായി ബന്ധപ്പെട്ട് കൂടുതല്‍ വിവരങ്ങള്‍ പുറത്തുവിടാന്‍ തയാറായിട്ടില്ല.

ആക്രമണത്തില്‍ ഇറാന്‍ പ്രതിരോധ മന്ത്രി  കൊല്ലപ്പെട്ടതായി കഴിഞ്ഞ ദിവസം റോയിട്ടേഴ്സ് റിപ്പോര്‍ട്ട് ചെയ്തിരുന്നു. ഇസ്ലാമിക് റെവല്യൂഷനറി ഗാര്‍ഡ് കമ്മാന്‍ഡര്‍ മുഹമ്മദ് പാഗോറും കൊല്ലപ്പെട്ടതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തിരുന്നു.

അതേസമയം അമേരിക്കയും, ഇസ്‌റാഈലും ഇറാന് മേല്‍ നടത്തിയ ആക്രമണം പശ്ചിമേഷ്യയില്‍ പ്രതിസന്ധി രൂക്ഷമാക്കിയിരിക്കുകയാണ്. മേഖലയിലെ യു.എസ് മിലിട്ടറി കേന്ദ്രങ്ങള്‍ ലക്ഷ്യം വെച്ച് ഇറാന്‍ തിരിച്ചടിച്ചു. സഊദി, യുഎഇ, ബഹ്റൈന്‍, ഖത്തര്‍ എന്നീ രാജ്യങ്ങളിലെ യു.എസ് മിലിട്ടറി കേന്ദ്രങ്ങള്‍  ലക്ഷ്യമിട്ടായിരുന്നു ആക്രമണം. 

ടെല്‍ അവീവിലും, ജറുസലേമിലും ഇറാന്‍ മിസൈലുകള്‍ പതിച്ചതായാണ് റിപ്പോര്‍ട്ട്. 

iran officially confirms that its military chief and defense minister have been killed, marking a major escalation in regional tensions and raising security concerns across the middle east.