കുവൈത്ത് സിറ്റി: ഇന്ത്യയില്‍ മുസ്‌ലിംകള്‍ക്കു നേരേ നടക്കുന്ന അതിക്രമങ്ങളെയും മനുഷ്യാവകാശ ധ്വംസനങ്ങളെയും അപലപിച്ച് കുവൈത്ത് നാഷനല്‍ അസംബ്ലി. ഇന്ത്യയില്‍ മുസ്‌ലിംകള്‍ക്കെതിരേ കൊലയും കുടിയൊഴിപ്പിക്കലും അഗ്‌നിക്കിരയാക്കലും തുടങ്ങി വിവേചനപരവും വര്‍ഗീയപരവുമായ അക്രമ പരമ്പര അരങ്ങേറുന്നതായി നാഷനല്‍ അസംബ്ലി അംഗങ്ങള്‍ പ്രസ്താവനയില്‍ പറഞ്ഞു. 

 

തീവ്ര ഹിന്ദുത്വ വിഭാഗങ്ങള്‍ അഴിച്ചുവിടുന്ന അക്രമങ്ങളെയും കുറ്റകൃത്യങ്ങളെയും സര്‍ക്കാര്‍ അപലപിക്കുകയോ നടപടിയെടുക്കുകയോ ചെയ്തിട്ടില്ല. മാനുഷികവും ഇസ്‌ലാമികവുമായ പരിഗണന വച്ചുകൊണ്ട് ഇന്ത്യയിലെ മുസ്‌ലിം സഹോദരങ്ങള്‍ക്ക് നാഷനല്‍ അസംബ്ലി പൂര്‍ണ ഐക്യദാര്‍ഢ്യം പ്രഖ്യാപിച്ചു. അവര്‍ക്കു നേരേയുള്ള വര്‍ഗീയ ഉന്മൂലന ശ്രമങ്ങളെ ശക്തമായി അപലപിക്കുന്നതായും അന്താരാഷ്ട്ര ഉടമ്പടികള്‍ പാലിക്കാനും അക്രമങ്ങള്‍ അവസാനിപ്പിക്കാനും മുസ്‌ലിംകളുടെ മതപരമായ അവകാശങ്ങള്‍ സംരക്ഷിക്കാനും സമാധാനത്തോടെ ജീവിക്കാന്‍ അവരെ അനുവദിക്കാനും പ്രസ്താവന ആവശ്യപ്പെട്ടു.

 

ഇന്ത്യന്‍ സര്‍ക്കാര്‍ ചെയ്തുകൂട്ടുന്ന കുറ്റകൃത്യങ്ങളെ അപലപിച്ച് കുവൈത്ത് വിദേശകാര്യ മന്ത്രാലയം പ്രസ്താവന ഇറക്കണമെന്ന് കുവൈത്ത് സര്‍ക്കാരിനോട് അഭ്യര്‍ഥിച്ചു. ഇന്ത്യന്‍ മുസ്‌ലിംകള്‍ക്കു നേരേയുള്ള ക്രൂരമായ നടപടികള്‍ ഔദ്യോഗിക സമൂഹമാധ്യമങ്ങളില്‍ എത്തിക്കണം. ഔഖാഫ് മന്ത്രാലയം ഇമാമുമാരോട് നിസ്‌കാരങ്ങളില്‍ ഖുനൂത് നിര്‍വഹിക്കാനും ഇന്ത്യയിലും മറ്റു പ്രദേശങ്ങളിലുമുള്ള മുസ്‌ലിംകളുടെ ദുരിതങ്ങളകറ്റാന്‍ പ്രാര്‍ഥന നടത്താന്‍ ആവശ്യപ്പെടണമെന്നും അവര്‍ ആവശ്യപ്പെട്ടു.

ഇന്ത്യന്‍ അധികാരികളെ മുസ്‌ലിംകള്‍ക്കെതിരായ അതിക്രമങ്ങളില്‍ നിന്ന് പിന്തിരിപ്പിക്കാന്‍ എല്ലാ അന്താരാഷ്ട്ര മനുഷ്യാവകാശ-ഇസ്‌ലാമിക സംഘടനകളോടും പ്രസ്താവന ആഹ്വാനം ചെയ്തു.