കോഴിക്കോട്: മോന്‍സണ്‍ പെരുങ്കള്ളനെന്ന് തെളിഞ്ഞതായി കെ.പി.സി.സി പ്രസിഡന്റ് കെ. സുധാകരന്‍ എം.പി. മോന്‍സണുമായി സാമ്പത്തിക ഇടപാട് നടത്തിയിട്ടില്ല. 

അങ്ങനെ ഒരു പ്രചാരണം മോന്‍സണ്‍ നടത്തുന്നുണ്ടെങ്കില്‍ നിയമനടപടിയുമായി മുന്നോട്ടുപോകുമെന്നും അദ്ദേഹം വാര്‍ത്താസമ്മേളനത്തില്‍ വ്യക്തമാക്കി.

മോന്‍സണെ കണ്ടതും ചികിത്സ തേടിയതും സത്യമാണ്. ചികിത്സക്കായി അഞ്ചുദിവസമാണ് പോയത്. പരാതിക്കാരനായ അനൂപുമായി ഒരു ഇടപാടുമില്ല. എത്രയോ സിനിമാ നടന്മാര്‍ അവിടെയെത്തുന്നുണ്ട്. മുഖ്യമന്ത്രിയെ വിഗ്രഹം പോലെ സംരക്ഷിക്കുന്ന ഉദ്യോഗസ്ഥര്‍ സ്ഥിരതാമസമാണവിടെ. അങ്ങനെയൊരു സ്ഥലത്തേക്ക് പോകുന്നതില്‍ താന്‍ മാത്രം എന്തിന് ശങ്കിക്കണം. സര്‍ക്കാര്‍ സംരക്ഷിക്കുന്ന ഫ്രോഡാണ് മോന്‍സണ്‍. ഉദ്യോഗസ്ഥന്‍മാരും മോന്‍സണും തമ്മിലുള്ള ബന്ധം എന്തുകൊണ്ടാണ് അന്വേഷിക്കാത്തത്. 

മോന്‍സണുമായി ബന്ധപ്പെടുത്തി തന്നെ ഇല്ലാതാക്കാനാണ് സി.പി.എം ശ്രമം. കോണ്‍ഗ്രസിലെ മാറ്റങ്ങള്‍ സി.പി.എമ്മിനെ ഭയപ്പെടുത്തുന്നുണ്ട്. പിണറായിക്കെതിരേയുള്ള വ്യക്തിപരമായ പോരാട്ടം അവസാനിപ്പിച്ചതായിരുന്നു. എന്നാല്‍ തനിക്കെതിരേ മുഖ്യമന്ത്രിയുടെ ഓഫിസ് വ്യക്തിഹത്യ തുടരുന്ന പശ്ചാത്തലത്തില്‍ പുനരാലോചന നടത്തേണ്ടി വരുമെന്നും സുധാകരന്‍ പറഞ്ഞു.