'തടവിലുള്ള മുഴുവന്‍ ഫലസ്തീനികളേയും വിട്ടയക്കൂ..ബന്ദികളെ മോചിപ്പിക്കൂ' പ്രിയപ്പെട്ടവരുടെ മോചനത്തിനായി നെതന്യാഹുവിനോട് പൊട്ടിത്തെറിച്ച് ബന്ധുക്കള്‍

തെല്‍അവീവ്: പ്രധാനമന്ത്രി ബിന്യമിന്‍ നെതന്യാഹു അടക്കമുള്ള വാര്‍ കാബിനറ്റുമായി നടത്തിയ കൂടിക്കാഴ്ചയില്‍ പൊട്ടിത്തെറിച്ച് ഹമാസ് ബന്ദികളാക്കിയവരുടെ ബന്ധുക്കള്‍. 60 ദിവസമായിട്ടും തങ്ങളുടെ പ്രിയപ്പെട്ടവരെ മോചിപ്പിക്കാത്ത നെതന്യാഹു സര്‍ക്കാറിനെതിരെ രൂക്ഷമായാണ് ഇവര്‍ പ്രതികരിച്ചത്.

ഹമാസ് ആവശ്യപ്പെടുന്നത് പോലെ എല്ലാ ഫലസ്തീനി തടവുകാരെയും വിട്ടയച്ച് ബന്ദികളുടെ മോചനം സാധ്യമാക്കണമെന്ന് സൂപ്പര്‍നോവ മ്യൂസിക് ഫെസ്റ്റിവലിനിടെ ബന്ദിയാക്കപ്പെട്ട യുവാവിന്റെ സുഹൃത്ത് ജെന്നിഫര്‍ മാസ്റ്റര്‍ നെതന്യാഹുവിനോട് ആവശ്യപ്പെട്ടു. വൃത്തികെട്ടതും അപമാനകരവും കുഴപ്പം പിടിച്ചതുമായിരുന്നു പ്രധാനമന്ത്രിയുമായുള്ള കൂടിക്കാഴ്ചയെന്ന് ബന്ദികളില്‍ ഒരാളായ ഒമ്രിയുടെ പിതാവ് ഡാനി മിറാന്‍ ഇസ്‌റാഈല്‍ ചാനലായ 'ചാനല്‍ 13'നോട് പറഞ്ഞു. കൂടിക്കാഴ്ചക്കിടെ തങ്ങളെ അവഹേളിച്ചതായും അതിനാല്‍ ഇടക്ക് വെച്ച് താന്‍ ഇറങ്ങിപ്പോന്നതായും അദ്ദേഹം പറഞ്ഞു.

'മീറ്റിങ്ങില്‍ ചര്‍ച്ച ചെയ്തതിന്റെ വിശദാംശങ്ങളിലേക്ക് ഞാന്‍ പോകുന്നില്ല. പക്ഷേ, സര്‍ക്കാര്‍ ഈ വിഷയത്തില്‍ പ്രഹസനമാണ് നടത്തുന്നത്. വൃത്തികെട്ടതും അപമാനകരവും കുഴപ്പം പിടിച്ചതുമായിരുന്നു കൂടിക്കാഴ്ച. ഞങ്ങള്‍ ഇത് ചെയ്തു, ഞങ്ങള്‍ അത് ചെയ്തു എന്നാണ് അവര്‍ (പ്രധാനമന്ത്രിയും മന്ത്രിമാരും) പറയുന്നത്. എന്നാല്‍, അവര്‍ ഒന്നും ചെയ്തിട്ടില്ല. ഞങ്ങളുടെ ആളുകളെ വിട്ടയച്ചത് ഹമാസിന്റെ ഗസ്സയിലെ നേതാവ് യഹ്‌യ സിന്‍വാറാണ്. അല്ലാതെ അവരല്ല. തങ്ങളാണ് സ്ഥിതിഗതികള്‍ നിയന്ത്രിക്കുന്നതെന്ന അവരുടെ അവകാശവാദം കേട്ടപേപാള്‍ എനിക്ക് രോഷം വന്നു. ഒന്നും അവരുടെ നിയന്ത്രണത്തിലല്ല' ഡാനി മിറാന്‍ പൊട്ടിത്തെറിച്ചു.

ബന്ദിമോചനം എന്ന് സാധ്യമാകും എന്ന കാര്യത്തില്‍ പ്രധാനമന്ത്രിയില്‍നിന്നും മന്ത്രിമാരില്‍നിന്നും തൃപ്തികരമായ മറുപടി ലഭിക്കാത്തതില്‍ പ്രതിഷേധിച്ച് ബന്ധുക്കളില്‍ ചിലര്‍ യോഗത്തിനിടെ ഇറങ്ങിപ്പോയി. ഹമാസ് വിട്ടയച്ച ബന്ദികളും നിലവില്‍ തടവില്‍ കഴിയുന്ന ബന്ദികളുടെ ബന്ധുക്കളുമാണ് ചൊവ്വാഴ്ച വൈകീട്ട് പ്രധാനമന്ത്രി ബിന്യമിന്‍ നെതന്യാഹു, പ്രതിരോധ മന്ത്രി യോവ് ഗാലന്റ്, മന്ത്രി ബെന്നി ഗാന്റ്‌സ് എന്നിവരടങ്ങുന്ന മന്ത്രിസഭാംഗങ്ങളുമായി ബന്ദിമോചനം സംബന്ധിച്ച് ചര്‍ച്ചക്കെത്തിയത്.

ഒക്ടോബര്‍ ഏഴിന് ഹമാസ് തടവിലാക്കിയ 247 ബന്ദികളില്‍ 110 പേരെയാണ് ഇതുവരെ വിട്ടയച്ചത്. 137പേര്‍ ഇപ്പോഴും ഹമാസിന്റെ രഹസ്യകേന്ദ്രങ്ങളില്‍ കഴിയുകയാണ്. ഇവരുടെ മോചനം ആവശ്യപ്പെട്ട് നടത്തുന്ന 'ബ്രിംഗ് ദേം ബാക്ക്' (ബന്ദികളെ തിരികെ കൊണ്ടുവരൂ) എന്ന കാമ്പെയ്ന്‍ പ്രതിനിധികളുമായാണ് ഇസ്‌റാഈലിന്റെ യുദ്ധ കാബിനറ്റിലെ മന്ത്രിമാര്‍ ഇന്നലെ അടച്ചിട്ട റൂമില്‍ ചര്‍ച്ച നടത്തിയത്.