കോട്ടയം: നവ കേരള സദസ്സിനായി ഏറ്റുമാനൂരില്‍ കടകള്‍ തുറക്കരുതെന്ന നോട്ടീസ് പൊലീസ് പിന്‍വലിച്ചു. സംഭവം വാര്‍ത്തയായതോടെയാണ് പൊലീസ് നോട്ടീസ് പിന്‍വലിച്ചത്. കടകള്‍ തുറന്ന് പ്രവര്‍ത്തിക്കുന്നതില്‍ പ്രശ്‌നമില്ലെന്നാണ് പുതിയ അറിയിപ്പ്. നവ കേരള സദസ്സ് നടക്കുമ്പോള്‍ ഉണ്ടാകാന്‍ സാധ്യതയുള്ള ഗതാഗതക്കുരുക്ക് ഒഴിവാക്കാനെന്ന വിശദീകരണത്തോടെയാണ് കടകള്‍ തുറക്കരുതെന്ന് ആദ്യം പൊലീസ് ഉത്തരവിട്ടത്.

ഏറ്റുമാനൂരില്‍ നവകേരള സദസ് നടക്കുന്ന വേദിക്കു ചുറ്റുമുള്ള കടകള്‍ നാളെ രാവിലെ 6 മുതല്‍ പരിപാടി തീരും വരെ അടച്ചിടാനായിരുന്നു ആവശ്യപ്പെട്ടത്. കോവില്‍ പാടം റോഡ്, പാലാ റോഡ് എന്നിവിടങ്ങളിലെ വ്യാപാരികള്‍ക്കാണ് പൊലീസ് നോട്ടീസ് നല്‍കിയത്. കടകള്‍ അടച്ചില്ലെങ്കില്‍
ഉണ്ടാകുന്ന ക്രമസമാധാന പ്രശ്‌നങ്ങള്‍ക്ക് കടയുടമകള്‍ ഉത്തരവാദികളായിരിക്കുമെന്ന് നോട്ടീസില്‍ പൊലീസ് പറഞ്ഞിരുന്നു. ഈ നോട്ടീസാണ് പൊലീസ് പിന്‍വലിച്ചത്.

നവ കേരള സദസ്സിനായി കടകള്‍ തുറക്കരുതെന്ന നോട്ടീസ് പൊലീസ് പിന്‍വലിച്ചു