മുംബൈ: മുംബൈ അധോലോക കുറ്റവാളിയായ ദാവൂദ് ഇബ്രാഹീമിന്റെ സ്വത്തുക്കള്‍ ലേലം ചെയ്യാനൊരുങ്ങി കേന്ദ്ര സര്‍ക്കാര്‍. ദാവൂദിന്റെ മുംബൈയിലേയും രത്‌നഗിരിയിലേയും സ്വത്തുക്കളാണ് ജനുവരി 5ന് ലേലം ചെയ്യാന്‍ തീരുമാനിച്ചിരിക്കുന്നത്.ബംഗ്ലാവും മാമ്പഴത്തോട്ടവും അടക്കം നാല് സ്വത്തുവകകള്‍ നേരത്തെ ഫോറിന്‍ എക്‌സ്‌ചേഞ്ച് ആക്ട് പ്രകാരം കണ്ടുകെട്ടിയിരുന്നു. ഇവയാണ് ലേലം ചെയ്യുന്നത്.

നേരത്തെയും ദാവൂദിന്റെ ഉടമസ്ഥതയിലുള്ള വസ്തുക്കള്‍ കേന്ദ്രം ലേലം ചെയ്തിരുന്നു. 4.53 കോടി വിലവരുന്ന റസ്‌റ്റോറന്റും 3.53 കോടി മൂല്യം വരുന്ന ആറ് ഫഌറ്റുകളും 3.52 കോടിയുടെ ഗസ്റ്റ് ഹൗസുമായിരുന്നു ലേലം ചെയ്തത്. രത്‌നഗിരി ഖേദ് ജില്ലയിലെ വസ്തുക്കള്‍ ദാവൂദിന്റെ സഹോദരി ഹസീന പാര്‍ക്കറിന്റെ പേരിലാണ് രജിസ്റ്റര്‍ ചെയ്തിരിക്കുന്നത്.അതിനിടെ ദാവൂദ് മരിച്ചതായി അടുത്തിടെ വാര്‍ത്തകളുണ്ടായിരുന്നു. എന്നാല്‍ അദ്ദേഹത്തിന്റെ അടുത്ത അനുയായിയായ ഛോട്ടാ ഷക്കീല്‍ അത് നിഷേധിച്ച് രംഗത്തെത്തി. ദാവൂദ് ആരോഗ്യവാനാണെന്നും അദ്ദേഹത്തിന് വിഷബാധയേറ്റെന്ന റിപ്പോര്‍ട്ടുകള്‍ തെറ്റാണെന്നും ഛോട്ടാ ഷക്കീല്‍ മാധ്യമങ്ങളോട് പറഞ്ഞിരുന്നു.

Content Highlights:Government to auction Dawood Ibrahim’s properties in Mumbai, Ratnagiri