ഭുവനേശ്വര്‍: സ്മാര്‍ട്‌ഫോണ്‍ വാങ്ങാനായി 17 കാരന്‍ ഭാര്യയെ 55 കാരന് വിറ്റു. രാജസ്ഥാനിലാണ് സംഭവം. വിവാഹത്തിന് ഒരുമാസത്തിനുശേഷം ഭാര്യയെ 55കാരനായ രാജസ്ഥാന്‍ സ്വദേശിക്ക് വില്‍ക്കുകയായിരുന്നു.

ജൂലൈയില്‍ ആയിരുന്നു 17കാരന്റെയും യുവതിയുടെയും വിവാഹം. ഒഡീഷ്യ സ്വദേശികളായ ഇവര്‍ വിവാഹത്തിനു ശേഷം രാജസ്ഥാനിലെ ഒരു ഇഷ്ടിക ചൂളയില്‍ പണിക്ക് പോയി. എന്നാല്‍ ഒരു മാസത്തിനുശേഷം 17 കാരന്‍ സ്മാര്‍ട്ട് ഫോണ്‍ വാങ്ങണം എന്ന് താല്പര്യം കൊണ്ട് ഭാര്യയെ വില്‍ക്കുകയായിരുന്നു.

പണമുപയോഗിച്ച് ഇഷ്ടഭക്ഷണം കഴിക്കുകയും സ്മാര്‍ട്ട് ഫോണ്‍ വാങ്ങുകയുമായിരുന്നെന്ന് 17കാരന്‍ പൊലീസിനോട് പറഞ്ഞു. 26കാരിയെ രാജസ്ഥാനിലെ ബാരനില്‍നിന്ന് പൊലീസ് രക്ഷപ്പെടുത്തി. മധ്യപ്രദേശുമായി അതിര്‍ത്തി പങ്കിടുന്ന ബാരന്‍ ജില്ലയിലെ ഗ്രാമത്തില്‍ നിന്നാണ് യുവതിയെ രക്ഷപ്പെടുത്തിയത്.

യുവതിയെ കൊണ്ടുപോകുന്നത് നാട്ടുകാര്‍ തടഞ്ഞു. 55കാരന്‍ പണം നല്‍കിയാണ് യുവതിയെ സ്വന്തമാക്കിയതെന്നും കൊണ്ടുപോകാന്‍ അനുവദിക്കില്ലെന്നും നാട്ടുകാര്‍ പറഞ്ഞു.

സ്വന്തം നാട്ടില്‍ തിരിച്ചെത്തിയ 17 കാരനോട് ഭാര്യ എവിടെ എന്ന് വീട്ടുകാര്‍ ചോദിച്ചപ്പോള്‍ തന്നെ ഉപേക്ഷിച്ചുപോയി എന്നായിരുന്നു ഇയാളുടെ മറുപടി.എന്നാല്‍ യുവതിയുടെ കുടുംബം പൊലിസില്‍ സമീപിക്കുകയും പൊലിസ് കോള്‍ റെക്കോര്‍ഡര്‍ പരിശോധിച്ചതോടെ കള്ളം പുറത്തുവരികയും ചെയ്യുകയായിരുന്നു.

17കാരനെ ജുവൈനല്‍ കോടതിയില്‍ ഹാജരാക്കിയ ശേഷം കറക്ഷനല്‍ ഹോമിലേക്ക് മാറ്റി.