വണ്ടിപ്പെരിയാര്‍: അരക്കിലോ കഞ്ചാവുമായി യുവാവിനെ  വണ്ടിപ്പെരിയാര്‍ എക്‌സൈസ് സംഘം അറസ്റ്റുചെയ്തു.
ആലപ്പുഴ അരൂര്‍ സ്വദേശി പ്രിയദര്‍ശന്‍ (30) ആണ് അറസ്റ്റിലായത്. കമ്പത്തുനിന്നും കഞ്ചാവു വാങ്ങി വരുമ്പോഴാണ് ഇയാളെ പിടികൂടിയത്.
5000 രൂപ വില നല്‍കിയാണ് കമ്പത്തുനിന്നും കഞ്ചാവു വാങ്ങിയതെന്ന് ഇയാള്‍ പറഞ്ഞു.
അരൂരിലുള്ള അഞ്ചു പേര്‍ ആയിരം രൂപാ വീതം സ്വരൂപിച്ച് ഇയാളെ കമ്പത്തിന് അയക്കുകയായിരുന്നു. കഞ്ചാവിന്റെ മണം വരാതിരിക്കാന്‍ പെര്‍ഫ്യൂം കഞ്ചാവ് പൊതിയില്‍ അടിച്ചിരുന്നു.
പെര്‍ഫ്യൂം ഇയാളുടെ പാന്റിന്റെ പോക്കറ്റില്‍ നിന്നും കണ്ടെടുത്തു.
വണ്ടിപ്പെരിയാര്‍ എക്‌സൈസസ് ഇന്‍സ്‌പെക്ടര്‍  സുനില്‍രാജ് സി. കെ യുടെ നേതൃത്വത്തില്‍ നടത്തിയ  റെയ്ഡില്‍ പ്രിവന്റീവ് ഓഫീസര്‍ പി.ഡി സേവ്യര്‍, സി.പി. കൃഷ്ണകുമാര്‍, ഹാപ്പിമോന്‍, സിവില്‍ എക്‌സൈസ് ഓഫീസര്‍മാരായ രാജ്കുമാര്‍, അനീഷ്, ജോബി തോമസ്, വനിത സിവില്‍ എക്‌സൈസ് ഓഫീസര്‍ സ്റ്റെല്ല ഉമ്മന്‍, ശ്രീദേവി എന്നിവര്‍ പങ്കെടുത്തു.  പ്രതിയെ പീരുമേട് ജുഡീഷ്യല്‍ ഒന്നാം ക്ലാസ്സ് മജിസ്‌ട്രേറ്റ് കോടതിയില്‍ ഹാജരാക്കി റിമാന്റ് ചെയ്തു.