കൊച്ചി
ഇനി മുഴുവൻ സമയ അഭിഭാഷകനായിരിക്കുമെന്നും എന്നാൽ അവസരം ലഭിച്ചാൽ സിനിമയിൽ അഭിനയിക്കുമെന്നും ബിനീഷ് കോടിയേരി.
സിനിമാഭിനയം തൊഴിലായല്ല കാണുന്നതെന്ന് പി.സി ജോർജിന്റെ മകൻ ഷോൺ ജോർജിനും മുൻ തെരഞ്ഞെടുപ്പ് കമ്മിഷണർ എൻ. മോഹൻദാസിന്റെ മകൻ നിനു മോഹൻദാസിനുമൊപ്പം തുടങ്ങിയ അഭിഭാഷക ഓഫിസിൻ്റെ ഉദ്ഘാടന വേളയിൽ ബിനീഷ് മാധ്യമങ്ങളോട് പറഞ്ഞു.
സ്‌നേഹംകൊണ്ടു മാത്രമാണ് സിനിമയിൽ തുടരുന്നത്. അഭിഭാഷകനായി പ്രാക്ടീസ് ചെയ്യുന്നത് പുതിയ തീരുമാനമല്ല. നേരത്തെതന്നെ തീരുമാനിച്ചതാണ്. കൊവിഡും കേസുകളും വന്നതോടെ നീണ്ടുപോകുകയായിരുന്നുവെന്നും ബിനീഷ് പറഞ്ഞു.
ബിനീഷ്, ഷോൺ, നിനു എന്നിവരുടെ സംരഭത്തിൽ സന്തോഷമെന്ന് ചടങ്ങിൽ പങ്കെടുത്ത പി.സി ജോർജ് പറഞ്ഞു.

അഭിഭാഷകവൃത്തിയും രാഷ്ട്രീയവും ഒരുമിച്ചു കൊണ്ടുപോകാനാകുമെന്ന് ഷോൺ പറഞ്ഞു. അഡ്വ. എസ്.പി അരവിന്ദാക്ഷൻ പിള്ളയുടെ ഓഫിസുമായി സഹകരിച്ചായിരിക്കും മൂവരും പ്രാക്ടീസ് നടത്തുക.
ലഹരിക്കടത്തുമായി ബന്ധപ്പെട്ട കള്ളപ്പണ ഇടപാടിൽ ജയിലിൽ കഴിഞ്ഞിരുന്ന ബിനീഷ് ഒരു വർഷത്തിനു ശേഷം കഴിഞ്ഞ ഒക്ടോബറിലാണ് ജാമ്യം ലഭിച്ച് പുറത്തിറങ്ങിയത്.