ചാവക്കാട്: ഖത്തര്‍ കെ.എം.സി.സി ഗുരുവായൂര്‍ നിയോജകമണ്ഡലം കമ്മിറ്റി സംഘടിപ്പിക്കുന്ന സമൂഹവിവാഹം ആഗസ്റ്റ് 31ന് നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു.
ഒരുമനയൂര്‍ സാബില്‍ പാലസില്‍ നടക്കുന്ന സമൂഹ വിവാഹത്തിനു പാണക്കാട് മുനവ്വറലി ശിഹാബ് തങ്ങള്‍ കാര്‍മികത്വം വഹിക്കും. ഓണംമ്പിള്ളി മുഹമ്മദ് ഫൈസി, പാലയൂര്‍ വികാരി ഫാ. ജോസപുന്നോലി പറമ്പില്‍, കരുണ ഫൗണ്ടേഷന്‍ ചെയര്‍മാന്‍ റിട്ട. ഡി.വൈ.എസ്.പി കെ.ബി സുരേഷ് തുടങ്ങിയവരും മുസ്‌ലിം ലീഗിന്റേയും പോഷക സംഘടനകളുടേയും സംസ്ഥാന, ജില്ലാ, മണ്ഡലം നേതാക്കളും സാമൂഹ്യ രാഷ്ട്രീയ സാംസ്‌കാരിക രംഗത്തെ പ്രമുഖരും സംബന്ധിക്കും.
സഹോദര സമുദായ അംഗങ്ങളടക്കം ഏഴു പേര്‍ക്ക് കെ.എം.സി.സിയുടെ തണലില്‍ മംഗല്ല്യ ഭാഗ്യം ലഭിക്കും. വധുവിന് അഞ്ചു പവന്‍ ആഭരണങ്ങളും, വിവാഹ വസ്ത്രങ്ങളും, വരന് 50,000 രൂപ സഹായവും, വിവാഹവസ്ത്രങ്ങളും നല്‍കും.
വധൂവരന്‍മാരുടെ ബന്ധുക്കളായ 200 പേര്‍ വീതം ഉള്‍പ്പടെ 3500 പേര്‍ക്കുള്ള വിവാഹചടങ്ങുകളാണ് സംഘടിപ്പിച്ചിട്ടുള്ളത്. ഖത്തര്‍ കെ.എം.സി.സി യുടെ രണ്ടാമത് സമൂഹവിവാഹമാണ് ഇപ്പോള്‍ നടക്കുന്നത്. 40 ലക്ഷത്തോളം രൂപ ചിലവ് പ്രതീക്ഷിക്കുന്നതായും ഭാരവാഹികള്‍ വ്യക്തമാക്കി.
ഖത്തര്‍ കെ.എം.സി.സി സീനിയര്‍ വൈസ് പ്രസിഡന്റ് എ.വി ബക്കര്‍ ഹാജി, അഡൈ്വസറി ബോര്‍ഡ് അംഗങ്ങളായ എ.വി അബൂബക്കര്‍ ഖാസിമി, എന്‍.കെ അബ്ദുല്‍ വഹാബ്, ജില്ലാ സെക്രട്ടറി എന്‍.ടി നാസര്‍, വൈസ് പ്രസിഡന്റ് ആര്‍.ഒ അഷ്‌റഫ്, മണ്ഡലം പ്രസിഡന്റ് ഹംസകുട്ടി കറുകമാട്, സ്വാഗസംഘം ഭാരവാഹി കെ.വി അബു എന്നിവര്‍ വാര്‍ത്താ സമ്മേളനത്തില്‍ പങ്കെടുത്തു.