കൊല്ലത്ത് എന്‍.ഡി.എ മുന്നണിക്ക് വേണ്ടി മത്സരിക്കുന്ന കൃഷ്ണ കുമാറിന്റെ കണ്ണിന് പരിക്കേല്‍പ്പിച്ച കേസില്‍ ബി.ജെ.പി പ്രവര്‍ത്തകന്‍ അറസ്റ്റില്‍.മുളവന സ്വദേശി സനലിനെ സ്റ്റേഷന്‍ ജാമ്യത്തില്‍ വിട്ടു. സ്വീകരിക്കാനെത്തിയപ്പോള്‍ അബദ്ധത്തില്‍ കണ്ണില്‍ താക്കോല്‍ കൊണ്ടതാണെന്ന് മൊഴി.സിപിഎമ്മിനെതിരെ പ്രസംഗിച്ചതിന് ബോധപൂര്‍വം ആക്രമിച്ചെന്നായിരുന്നു കൃഷ്ണകുമാറിന്റെ പരാതി. ആയുധം ഉപയോഗിച്ച് ആക്രമിച്ചെന്ന കുറ്റമാണ് പൊലീസ് ചുമത്തിയത്.

തൃശൂര്‍ പൂരം അലങ്കോലപ്പെടുത്തിയ വിഷയത്തില്‍ സിപിഎം നേതാക്കള്‍ക്കെതിരെ ശക്തമായ ഭാഷയില്‍ പ്രതികരിച്ചതിന്റെ പേരില്‍ മൂര്‍ച്ചയുള്ള ആയുധം ഉപയോഗിച്ച് സിപിഎം പ്രവര്‍ത്തകര്‍ ആക്രമിച്ചെന്നായിരുന്നു കുണ്ടറ പൊലീസ് സ്റ്റേഷനില്‍ നല്‍കിയ പരാതി. തുടര്‍ന്ന്, കുണ്ടറ പോലീസും രഹസ്യ അന്വേഷണ വിഭാഗവും നടത്തിയ അന്വേഷണത്തിലാണ് പ്രതിയെ തിരിച്ചറിഞ്ഞത്.