പത്തനംതിട്ട: ഒറ്റയ്ക്ക് താമസിക്കുന്ന വയോധികയുടെ വീട്ടിലെത്തി അജ്ഞാതൻ കുത്തിവയ്പെടുത്തു. റാന്നി വലിയ കലുങ്ക് സ്വദേശി ചിന്നമ്മയ്ക്കാണ് അജ്ഞാതൻ കുത്തിവയ്പെടുത്തത്. കൊവിഡ് വാക്സിൻ ബൂസ്റ്റര്‍ ഡോസ് എന്ന് തെറ്റിദ്ധരിപ്പിച്ചാണ് അജ്ഞാതനായ യുവാവ് കുത്തിവെപ്പെടുത്തത്. സംഭവത്തില്‍ റാന്നി പൊലിസ് കേസെടുത്തു. 

അസാധാരണമായ സംഭവമാണ് നടന്നത്. ഒറ്റയ്ക്ക് താമസിക്കുന്ന സ്ത്രീയെ വീട്ടില്‍ കയറിച്ചെന്ന് അജ്ഞാതനായ യുവാവ് കുത്തിവെക്കുകയായിരുന്നു. വേണ്ടെന്ന് പറഞ്ഞെങ്കിലും യുവാവ് നിര്‍ബന്ധിക്കുകയായിരുന്നു വെന്ന് ചിന്നമ്മ പറയുന്നു. നടുവിന് ഇരുവശത്തും ആയാണ് കുത്തിവയ്പെടുത്തത്. ഇതിനുപയോഗിച്ച സിറിഞ്ച് ചിന്നമ്മയ്ക്ക് തന്നെ നല്‍കിയ യുവാവ്, സിറിഞ്ച് കത്തിച്ചുകളയാൻ നിർദേശിച്ചുവെന്നും ചിന്നമ്മ പറഞ്ഞു. എന്നാൽ സിറിഞ്ച് ചിന്നമ്മ നശിപ്പിച്ചിരുന്നില്ല. ഇത് അന്വേഷണത്തിന്റെ ഭാഗമാകും.

സംഭവത്തില്‍ പൊലിസ് അന്വേഷണം തുടങ്ങി. ഇയാള്‍ സഞ്ചരിച്ചിരുന്നത് ഒരു വെള്ള സ്കൂട്ടറിലെന്നാണെന്നത് വ്യക്തമായിട്ടുണ്ട്. ഈ വണ്ടി കേന്ദ്രീകരിച്ചും അന്വേഷണം നടക്കുന്നുണ്ട്. പ്രതിയെ വൈകാതെ കണ്ടെത്താൻ സാധിക്കുമെന്ന് തന്നെയാണ് പൊലിസ് പ്രതീക്ഷിക്കുന്നത്.

അതേസമയം 66 കാരിയായ ചിന്നമ്മയുടെ ആരോഗ്യനില തൃപ്തികരമാണ്. കോട്ടയം മെഡിക്കല്‍ കോളേജില്‍ പ്രവേശിപ്പിച്ചിരുന്നെങ്കിലും ഇവിടെ നിന്ന് ഡിസ്ചാര്‍ജ് ചെയ്തിട്ടുണ്ട്. എന്തിന് വേണ്ടിയാണ് യുവാവ് ഇത്തരമൊരു കാര്യം ചെയ്തതെന്ന് വ്യക്തമല്ല