റിയാദ്: ഡിജിറ്റല്‍ മേഖലയില്‍ അടിസ്ഥാനസൗകര്യങ്ങള്‍ വികസിപ്പിക്കുന്നതില്‍ വന്‍ മുന്നേറ്റം കൈവരിച്ച സഊദി അറേബ്യക്ക് മൊബൈല്‍ ഇന്റര്‍നെറ്റ് വേഗതയില്‍ വമ്പന്‍ നേട്ടം. കമ്മ്യൂണിക്കേഷന്‍സ്, സ്പേസ് ആന്‍ഡ് ടെക്നോളജി കമ്മീഷന്‍ (സി.എസ്.ടി) പുറത്തിറക്കിയ സഊദി ഇന്റര്‍നെറ്റ് റിപ്പോര്‍ട്ട് 2025 ന്റെ അഞ്ചാം പതിപ്പില്‍ രാജ്യത്തെ ഇന്റര്‍നെറ്റ് വേഗത മുന്നേറുകയാണെന്ന് വ്യക്തമാക്കുന്നു.

രാജ്യത്തെ ശരാശരി മൊബൈല്‍ ഇന്റര്‍നെറ്റ് ഡൗണ്‍ലോഡ് വേഗത 203 എം.ബി.പി.എസില്‍ നിന്ന് 216 ആയി ഉയര്‍ന്നു. ഇതോടെ ജി20 രാജ്യങ്ങളില്‍ സഊദി അറേബ്യ ആദ്യ അഞ്ച് സ്ഥാനത്തെത്തി. രാജ്യത്തെ ഒരു വ്യക്തിയുടെ പ്രതിമാസ മൊബൈല്‍ ഡാറ്റ ഉപഭോഗം ശരാശരി 53 ജി.ബി എത്തി. ആഗോള ശരാശരിയുടെ മൂന്നിരട്ടിയാണിത്. അതേസമയം ശരാശരി 5ജി ഡൗണ്‍ലോഡ് വേഗത 24 മില്ലിസെക്കന്‍ഡ് ലേറ്റന്‍സിയോടെ 320 എം.ബി.പി.എസ് എത്തിയെന്നും റിപ്പോര്‍ട്ട് കാണിക്കുന്നു.

ഇന്റര്‍നെറ്റ് ശരാശരി ഡൗണ്‍ലോഡ് വേഗത 120.4 എം.ബി.പിഎസില്‍ നിന്ന് 151 ആയി ഉയര്‍ന്നു. അപ്ലോഡ് വേഗത 73 എം.ബി.പിഎസും ലേറ്റന്‍സി 8 മില്ലിസെക്കന്‍ഡും ആയി. രാജ്യത്തെ മൊത്തം ഇന്റര്‍നെറ്റ് ഡാറ്റ ട്രാഫിക് 69 ദശലക്ഷം ടെറാബൈറ്റിലെത്തി. ഈയിടെ പുറത്തുവിട്ട ഇന്റര്‍നാഷണല്‍ ടെലികമ്മ്യൂണിക്കേഷന്‍ യൂണിയന്റെ 2026 ലെ ഐ.സി.ടി വികസന സൂചികയില്‍ 159 സമ്പദ്വ്യവസ്ഥകളില്‍ സഊദി അറേബ്യ ഒന്നാം സ്ഥാനത്തെത്തിയിരുന്നു.

English summary : Saudi Arabia has achieved a significant milestone in mobile internet performance, reflecting its continued investment in digital infrastructure. According to the fifth edition of the Saudi Internet Report 2025 released by the Communications, Space and Technology Commission (CST), the Kingdom's average mobile internet download speed has increased from 203 Mbps to 216 Mbps, placing Saudi Arabia among the top five G20 countries in mobile internet speed