ഗസ്സ: ഗസ്സയില്‍ കഴിഞ്ഞ 24 മണിക്കൂറിനിടെ ഇസ്‌റാഈല്‍ ആക്രമണത്തില്‍ 82 പേര്‍ കൊല്ലപ്പെട്ടു. വടക്കന്‍ ഗസ്സയിലെ ജബാലിയയില്‍ ഇസ്‌റാഈല്‍ സൈന്യവും ഹമാസും ഏറ്റുമുട്ടലുണ്ടായി. ഇരുഭാഗത്തും നിരവധി പേര്‍ക്ക് പരുക്കേറ്റു. ഈയിടെ ഗസ്സയിലുണ്ടാകുന്ന ഏറ്റവും ശക്തമായ ആക്രമണമാണ് ഇന്നലെ നടന്നത്. 

റഫയില്‍ നിന്ന് 4.5 ലക്ഷം പേര്‍ ഇതിനകം പലായനം ചെയ്തിട്ടുണ്ട്. വടക്കന്‍ ഗസ്സയില്‍ നിന്നും ഒരു ലക്ഷം പേര്‍ പലായനം ചെയ്തു. ഇതുവരെ 35,233 പേര്‍ ഗസ്സയില്‍ കൊല്ലപ്പെട്ടു. 79,141 പേര്‍ക്ക് പരുക്കേറ്റു. ഇന്നലെ ജബാലിയ ആക്രമണത്തിലാണ് കൂടുതല്‍ പേര്‍ കൊല്ലപ്പെട്ടത്. രാത്രിയിലും ആക്രമണം തുടരുന്നതായാണ് റിപ്പോര്‍ട്ട്. 

അതേസമയം, റഫയില്‍ മനുഷ്യസഹായ പ്രശ്‌നമില്ലെന്ന് ഇസ്‌റാഈല്‍ പ്രധാനമന്ത്രി ബെന്യാമിന്‍ നെതന്യാഹു പറഞ്ഞു. അവിടെ പട്ടിണിയോ, രോഗമോ ഇല്ലെന്നും അദ്ദേഹം പറഞ്ഞു. ഇന്ധനം തീര്‍ന്നതിനെ തുടര്‍ന്ന് റഫയിലെ ആശുപത്രികളുടെ പ്രവര്‍ത്തനം തടസപ്പെട്ടു.