ന്യൂഡല്‍ഹി: സ്വാതി മലിവാള്‍ എം.പിയെ മര്‍ദിച്ചെന്ന പരാതിയില്‍ ഡല്‍ഹി മുഖ്യമന്ത്രി അരവിന്ദ് കെജ് രിവാളിന്റെ പി.എ ബൈഭവ് കുമാര്‍ അറസ്റ്റില്‍. കെജ് രിവാളിന്റെ ഡല്‍ഹി പൊലിസ് അറസ്റ്റ് ചെയ്തത്. അതിനിടെ സ്വാതി മലിവാളിന്റെ ശരീരത്തില്‍ പരുക്കുകളുണ്ടെന്ന വ്യക്തമാക്കുന്ന വൈദ്യ പരിശോധനാ ഫലം പുറത്ത് വന്നു. ഇടത്തേ കാലിനും, കണ്ണിന് താഴെയും, കവിളിലും പരുക്കുകളുണ്ടെന്നാണ് റിപ്പോര്‍ട്ട് പറയുന്നത്. സംഭവം വിവാദമായതോടെ ബൈഭവ് ഒളിവിലായിരുന്നു.  

ബിഭവ് കുമാര്‍ ഏഴോ എട്ടോ തവണ മുഖത്തടിച്ചുവെന്നും നെഞ്ചിലും ഇടുപ്പിലും രഹസ്യഭാഗങ്ങളിലും ചവിട്ടിയെന്നും സ്വാതി മൊഴി നല്‍കിയതായി പൊലിസ് എഫ്.ഐ.ആറില്‍ പറയുന്നു. ഇക്കാര്യം പുറത്തുപറഞ്ഞാല്‍ പ്രത്യാഘാതം ഗുരുതരമായിരിക്കുമെന്ന് ഭീഷണിപ്പെടുത്തിയതായും എഫ്.ഐ.ആറില്‍ രേഖപ്പെടുത്തിയിട്ടുണ്ട്.

ഈ മാസം 13ന് മുഖ്യമന്ത്രി കെജ്‌രിവാളിന്റെ സിവില്‍ ലൈനിലുള്ള വസതിയിലെ ഡ്രോയിങ് റൂമില്‍ മുഖ്യമന്ത്രിയെ കാത്തു നില്‍ക്കുമ്പോള്‍ ബിഭവ് കുമാര്‍ പ്രകോപനമില്ലാതെ തന്നെ അധിക്ഷേപിച്ചെന്നും മര്‍ദിച്ചുവെന്നുമാണ് മൊഴിയിലുള്ളത്. താന്‍ സഹായത്തിനായി നിലവിളിച്ചെങ്കിലും ആരും വന്നില്ല. താന്‍ പുറത്തുപോയി സുരക്ഷാ ഉദ്യോഗസ്ഥരുമായി തിരികെ വരുന്നതിന് മുമ്പ് അയാള്‍ അവിടെ നിന്നും പോയിരുന്നുവെന്നും സ്വാതി മലിവാള്‍ പറയുന്നു.