പൂനെ: 2023ല്‍ ലണ്ടനില്‍ നടത്തിയ പ്രസംഗത്തില്‍ കോണ്‍ഗ്രസ് നേതാവ് രാഹുല്‍ ഗാന്ധി വി.ഡി സവര്‍ക്കറെ അപമാനിച്ചെന്ന് പൂനെ പൊലിസിന്റെ റിപ്പോര്‍ട്ട്. റിപ്പോര്‍ട്ട് പൂനെ പൊലിസ് കോടതിയില്‍ സമര്‍പ്പിച്ചു. 

സവര്‍ക്കറുടെ അനന്തരവനയ സത്യകി അശോക് സവര്‍ക്കറാണ് രാഹുല്‍ ഗാന്ധിക്കെതിരെ കോടതിയെ സമീപിച്ചത്. സംഭവത്തെക്കുറിച്ച് അന്വേഷിച്ച് റിപ്പോര്‍ട്ട് സമര്‍പ്പിക്കാന്‍ കോടതി പൂനെ പൊലിസിനോട് ആവശ്യപ്പെട്ടിരുന്നു. കോടതിയില്‍ ഹാജരാവാന്‍ ആവശ്യപ്പെട്ട് രാഹുല്‍ ഗാന്ധിക്ക് നോട്ടിസ് അയക്കുമെന്ന് ജസ്റ്റിസ് അക്ഷി ജയിന്‍ പറഞ്ഞു.

രാഹുല്‍ ഗാന്ധിക്കെതിരെ ഐ.പി.സി 499, 500 വകുപ്പുകള്‍ പ്രകാരം നടപടി വേണമെന്ന് ആവശ്യപ്പെട്ട് സത്യകി സവര്‍ക്കര്‍ കഴിഞ്ഞ ഏപ്രിലിലാണ് കോടതിയെ സമീപിച്ചത്. സത്യകി സമര്‍പ്പിച്ച തെളിവുകള്‍ പരിശോധിച്ച് റിപ്പോര്‍ട്ട് സമര്‍പ്പിക്കാന്‍ കോടതി വിശ്രംബൗഗ് പൊലിസിനോട് ആവശ്യപ്പെട്ടിരുന്നു.

താനും അഞ്ചോ ആറോ സുഹൃത്തുക്കളും ചേര്‍ന്ന് ഒരു മുസ്‌ലിമിനെ മര്‍ദിച്ചപ്പോള്‍ വലിയ സന്തോഷം തോന്നിയെന്ന് വി.ഡി സവര്‍ക്കര്‍ ഒരു പുസ്തകത്തില്‍ എഴുതിയിട്ടുണ്ട് എന്ന് രാഹുല്‍ ഗാന്ധി പ്രസംഗിച്ചുവെന്ന് ചൂണ്ടിക്കാട്ടിയാണ് സത്യകി പരാതി നല്‍കിയത്. അങ്ങനെയൊരു സംഭവമുണ്ടായിട്ടില്ലെന്നും സവര്‍ക്കര്‍ എവിടെയും അങ്ങനെ എഴുതിയിട്ടില്ലെന്നും സത്യകി പറഞ്ഞു. രാഹുല്‍ ഗാന്ധിയുടെ ആരോപണം പൂര്‍ണമായി കളവും കെട്ടിച്ചമച്ചതുമാണെന്നും സത്യകിയുടെ പരാതിയില്‍ പറയുന്നു.