കൂടരഞ്ഞി: നിലമ്പൂര്‍ എംഎ.ല്‍.എ പി.വി അന്‍വറിന്റെ കക്കാടംപൊയിലിലെ പി.വി.ആര്‍ നാച്വറോ റിസോര്‍ട്ടിലെ കാട്ടരുവി മണ്ണിട്ട് മൂടിയെന്ന പരാതിയില്‍ ഹൈക്കോടതി നിര്‍ദേശ പ്രകാരം കോഴിക്കോട് ജില്ലാ കലക്ടര്‍ കക്ഷികളില്‍ നിന്നും ഇന്ന് തെളിവെടുക്കും. കാട്ടരുവി തടഞ്ഞ് നിര്‍മിച്ച നാലു തടയണകള്‍ പൊളിച്ചുനീക്കാന്‍ ഹൈക്കോടതി ഉത്തരവിട്ടപ്പോള്‍ മണ്ണിടിച്ച് കാട്ടരുവി തന്നെ ഇല്ലാതാക്കിയെന്ന പരാതിയിലാണ് ഇന്ന് തെളിവെടുപ്പ് നടക്കുന്നത്. പരാതിക്കാരന്‍ ടി.വി രാജന്‍, കൂടരഞ്ഞി പഞ്ചായത്ത് സെക്രട്ടറി, താമരശേരി തഹസില്‍ദാര്‍, കൂടരഞ്ഞി വില്ലേജ് ഓഫിസര്‍, പി.വി.ആര്‍ നാച്വറോ റിസോര്‍ട്ട് മാനേജര്‍ എന്നിവര്‍ക്കാണ് രേഖകള്‍ സഹിതം ഇന്ന് രാവിലെ 12ന് കലക്ടറേറ്റില്‍ വിചാരണയില്‍ ഹാജരാകാന്‍ നോട്ടിസ് നല്‍കിയിട്ടുള്ളത്.

അഞ്ചു വര്‍ഷം നീണ്ട നിയമ പോരാട്ടത്തിനൊടുവിലാണ് പി.വി അന്‍വറിന്റെ അപ്പീല്‍ തള്ളി ചീഫ് ജസ്റ്റിസ് അധ്യക്ഷനായ ഹൈക്കോടതി ഡിവിഷന്‍ ബെഞ്ച് റിസോര്‍ട്ടിലെ നാല് തടയണകളും ഒരു മാസത്തിനകം പൊളിച്ചുനീക്കാന്‍ കഴിഞ്ഞ വര്‍ഷം ജനുവരി 31ന് ഉത്തരവിട്ടത്. തടയണകള്‍ പൊളിച്ചു നീക്കുന്നതിന്റെ മറവിലാണ് ഇരുവഴിഞ്ഞിപ്പുഴയുടെ കൈവഴിയായ കാട്ടരുവി തന്നെ മണ്ണിട്ട് മൂടിയത്. തടയണകെട്ടിയ സ്ഥലത്ത് കിണര്‍ കുത്തുകയും ചെയ്തിരുന്നു. ടി.വി രാജന്‍ കോഴിക്കോട് കലക്ടര്‍ക്ക് പരാതി നല്‍കിയിട്ടും ഒരു നടപടിയും സ്വീകരിച്ചിട്ടില്ല. ഇതോടെയാണ് ഹൈക്കോടതിയെ സമീപിച്ചത്.