മക്കേ: ചതുര്‍രാഷ്ട്ര എ ടീമുകളുടെ ഏകദിന പരമ്പരയില്‍ ആസ്‌ത്രേലിയ എയ്‌ക്കെതിരേ ഇന്ത്യ എയ്ക്ക് ഒരു റണ്ണിന്റെ തോല്‍വി. ആസ്‌ത്രേലിയ ഉയര്‍ത്തിയ 323 റണ്‍സിന്റെ കൂറ്റന്‍ വിജയ ലക്ഷ്യം പിന്തുടര്‍ന്ന ഇന്ത്യയ്ക്ക് നിശ്ചിത ഓവറില്‍ എട്ടു വിക്കറ്റ് നഷ്ടത്തില്‍ 321 റണ്‍സെടുക്കാനേ സാധിച്ചുള്ളൂ. അവസാന രണ്ടു പന്തുകളില്‍ മൂന്നു റണ്‍സ് മാത്രം മതിയായിരുന്ന ഇന്ത്യക്ക് രണ്ടു വിക്കറ്റുകള്‍ നഷ്ടമായതാണ് തിരിച്ചടിയായത്. ജയത്തോടെ ആസ്‌ത്രേലിയ ഇന്ത്യയുമായുള്ള കലാശപ്പോരിന് യോഗ്യത നേടി.

സ്‌കോര്‍ പിന്തുടര്‍ന്ന ഇന്ത്യയെ ക്യാപ്റ്റന്‍ മനീഷ് പാണ്ഡെ(110)യുടെ സെഞ്ച്വറിയാണ് മുന്നോട്ടു നയിച്ചത്. മന്‍ദീപ് സിങ്(56) സഞ്ജു സാംസണ്‍(87) എന്നിവരും നന്നായി ബാറ്റു ചെയ്തു. എന്നാല്‍ ഫൈസ് ഫസല്‍(12) ശ്രേയസ് അയ്യര്‍(13) കേദാര്‍ ജാദവ്(20) ഹര്‍ദിക് പാണ്ഡ്യ(2) എന്നിവര്‍ നിരാശപ്പെടുത്തി. നേരത്തെ കര്‍ട്ടിസ് പാറ്റേഴ്‌സന്‍(115) നിക് മാഡിന്‍സന്‍(118) എന്നിവരുടെ സെഞ്ച്വറിയാണ് ആസ്‌ത്രേലിയക്ക് മികച്ച സ്‌കോര്‍ സമ്മാനിച്ചത്.