പാലക്കാട്: കേന്ദ്ര ബജറ്റില്‍ കസ്റ്റംസ് തീരുവ കുറച്ചതിന് പിന്നാലെ സ്വര്‍ണ വിലയില്‍ വന്‍ ഇടിവ് സംഭവിച്ചത് പണമിടപാട് സ്ഥാപനങ്ങളെ പ്രതിസന്ധിയിലാക്കി. സ്വര്‍ണപ്പണയ വായ്പകള്‍ നല്‍കുന്ന ദേശസാത്കൃത ബാങ്കുകള്‍, സഹകരണ സംഘങ്ങള്‍, സ്വകാര്യ ഫിനാന്‍സ് സ്ഥാപനങ്ങള്‍ എന്നിവക്കാണ് വിലയിടിവ് പ്രതിസന്ധി സൃഷ്ടിക്കുന്നത്.

ഇന്നലെ പവന് 2000 രൂപ കുറഞ്ഞതോടെ ഈ മാസത്തെ കുറഞ്ഞ നിരക്കാണ് സ്വര്‍ണത്തിന് രേഖപ്പെടുത്തിയത്. ജൂലൈ ഒന്നിന് പവന് 53000 രൂപയായിരുന്നു. ജുലൈ 17നത് 55000 വരെയായി വര്‍ധിച്ചു. ആറ് ദിവസങ്ങള്‍ക്കിടെ പവന് 3040 രൂപയുടെ കുറവാണ് ഉണ്ടായത്. 107 ദിവസങ്ങള്‍ക്കിടെയുള്ള കുറഞ്ഞ നിരക്കും ഉയർന്ന ഇടിവുമാണ് ഇന്നലത്തേത്. 2024 ഏപ്രില്‍ 26ലെ പവന് 52280 രൂപയായിരുന്നു കുറഞ്ഞ നിരക്ക്. പവന് 1120 രൂപ കുറഞ്ഞ ഏപ്രില്‍ 23നാണ് വലിയ ഇടിവ് രേഖപ്പെടുത്തിയത്. 22ന് 54040 രൂപയുണ്ടായിരുന്നത് 23ന് 52920 രൂപയായി കുറഞ്ഞിരുന്നു.

കസ്റ്റംസ് തീരുവ കുറച്ചതോടെ വരും ദിവസങ്ങളിലും വില കുറയാന്‍ കാരണമാകുമെന്നാണ് സാമ്പത്തിക വിദഗ്ധരുടെ വിലയിരുത്തല്‍. ഇറക്കുമതി സുലഭമാകുമെന്നതും സ്വര്‍ണത്തെ വിശ്വസ്ത നിക്ഷേപമായി കാണുന്നവരുടെ എണ്ണം കുറയുമെന്നതുമാണ് ഇതിന് കാരണമായി ചൂണ്ടിക്കാട്ടുന്നത്. ഈ വിലയിരുത്തലുകളും ഈ മേഖലയിലെ പ്രതിസന്ധി വരും ദിവസങ്ങളില്‍ രൂക്ഷമാക്കുമെന്ന സൂചനയാണ് നല്‍കുന്നത്.